Foodie 生活雜誌

3/2021 光顧

見到網上對餐廳評價不俗，過來一試，好耐無去官涌，原來條街已經變得幾有型格。餐廳裝修morden，以酒吧餐廳形式經營，喺小街上好突出。菜式係近年流行的西日菜，菜單設計頗有心思，雖然味道中規中矩，但睇得出煮得有心機，印象唔算深刻，但喺佐敦區算係一個不俗的選擇。

白酒煮托托蜆 托托蜆近年多左喺餐牌上出現，我喜歡佢肥大肉厚，見到通常都點。當日的蜆質量好，肉質嫩滑，但有點過生的感覺，我知係唔可以太熟，但以當日火喉來計，煮熟多少少會更好。

煎羊架(半份) 又係有點過生，只能做到生嫩的肉質，唔係柔軟嫩滑，麻麻。原棵蒜頭加燒汁，幾認真。

睡蟹意大利飯 意大利飯放入蟹蓋內，蟹肉多，飯粒有咬口，cream sauce濃稠合度，加上三文魚子吊出咸鮮味，以濃濃的蟹膏煮成的醬汁拌飯同食，幾好。

當日午餐menu，無乜興趣，所以散點

餐廳喺小街上，水泥加木材裝修，幾有型格，喺小街上好搶眼

每次見到原本裝修得唔錯的店面，但被整到立立亂，就會覺得餐廳好唔認真，好似呢度咁，明明將呢d雜物放喺吧枱後已經可以好整齊，點解硬係要咁亂，破壞氣氛。侍應好有禮貌，但收碟時倒到成地汁都唔知，要我提佢至知，真怕跣親佢。最搞笑係個掉食餘的垃圾桶都放喺外場，其實裝修同食物出品都唔錯，點解要搞到樓面成間茶餐廳咁feel?

餐廳旁係花店加咖啡店，有酒供應，佈置得幾靚，好啱打咭