舍利鮨@元朗－Foodie 生活雜誌

2/2021光顧

呢期好紅的鮨店，雖然好多人讚，但似乎唔啱我口味，除左裝修以外，無樣合心意，今次係我第二次慕名入元朗試Omakase，以後就算講到好食到識飛，我估應該無第三次(Never say never，我唔敢寫到咁死😜)

Lunch 分三個價錢，我預訂左個再貴d的「疫情套餐」，即係因為無開晚市，整多個食材較高級的set，所以呢個餐刺身都多幾款。

蒸蛋 唔好講好唔好味，我都未坐低已經上左，仲幫我掲埋蓋，好趕，咩心情都無哂。

魚切好哂，一叠叠咁，唔緊要，最慘係無魚味，不過而家好多間都係咁，佢唔算最差

小長井蠔，我喜歡食的日本蠔，肉質爽口，但呢隻唔夠鮮甜

沙鰈魚 有邊位同背部，邊位燒到似肥豬肉，口感差，背位無魚味

鯖魚

壽司上場，刺身繼續無味，估唔到連飯都有點乾硬，好耐無試過想快點完的omakase

壽司 : 針魚、間八、青柳貝、池魚、鰆魚 、金目鯛、鰤魚、海膽烏賊、剝皮魚、赤鯥、牡丹蝦、拖羅、蔥吞拿魚腩手卷。當中針魚、牡丹蝦不俗。

甜品算係全餐最好的一道菜，擺盤靚，糖漿丸子軟糯好味

雖然喺元朗都照入，不過其實有左西鐵，入元朗都好方便快捷。元朗超級勁多人，鮨店開喺私人屋苑內，算清靜。

餐廳裝修清雅精緻，十四人的壽司枱由三位師傅serve，比例合理。但我一坐低已知出事，外套未除，袋都未放好已上蒸蛋，仲幫我開埋蓋，好趕時間。侍應又過分殷勤，係咁不停收碟斟茶，差不多我手都未放低就想收，我明白佢係好勤力，但成件事搞到好趕咁，最好笑係見到我打手機時居然隊個頭來睇，再同我攀談，真係年輕，經驗未夠。

最火滾係食食下隔離位的幾個食客有朋友來，似茶餐廳搭枱咁企左喺後面傾左半餐飯時間！係咁吹噓自己有幾勁，煩死人😡我無出聲，不過最後師傅都我道歉，原來呀搭枱先生係餐廳其中一個老闆，我都估到，否則有邊間食omakase 的餐廳會咁樣？我唯有同師傅講做大的都唔理，你又可以點？相信餐廳無打算走高檔路線，應該係我誤會左。到我離開時，個所謂老闆係咁同我講bye bye，我都費事睬佢。