Foodie 生活雜誌

11/2020光顧

呢餐新派韓菜真係得啖笑。餐廳係韓國名店個chef過來香港開的餐廳，走精緻韓菜路線，朋友食過韓國店讚不絕口，見雜誌介紹就立即訂位，但已經排喺兩個月後，無所謂，我又唔心急，不過見咁火紅，都有點期待。到差不多食的日子，睇下網上分享，個個讚到飛天，但我睇相就覺得唔多對路，用餐時間仲要分兩輪，想縮沙，不過得到食友鼓勵：「未食過就無得話唔好食嘛」，決定去馬，結果如我所料，完全唔啱我口味，所謂結合傳統的新派韓菜，我就覺得兩頭唔到岸，雖然比傳統韓菜精緻，味道亦較清淡，但變化後只覺得食緊普通西餐，食材亦唔見得高質，七道菜，份量少，物非所值，我唔識欣賞，都係幫襯番傳統韓食店好了。

💕最後多謝幾位食友付出寶貴時間同金錢陪我食一餐我自己都無信心會好食的菜，感激🙏🏻

Chogochujang醬伴八爪魚及蔬菜，醬汁酸辣，八爪魚嫩口，配會番茄仔及橘子，幾醒胃，不俗的頭盤。

Seasonal Korean chips 用籃子裝住，賣相幾精緻，入面係炸魚皮、炸海帶、炸牛蒡，只得其中一款炸海帶特別脆口，其他一般

beef tartar 無味，非常平凡

人蔘雞意大利飯 全餐唯一亮點，一個做得比較好的人蔘雞湯變奏版。人蔘雞湯香濃，雞捲皮香肉嫩，配意大利飯比原版的糯米飯輕盈，整體出色，可惜得幾啖。

聲稱醃製兩年的泡菜，大家都覺得似潮州大頭菜。

chef choice seasonal fritters 係兩塊煎餅，一塊肉一塊魚，無嘢寫。

白烚五花腩配冷麵五花腩肉層次分明，冷麵上鋪滿紫菜蓉，但賣相同食味一樣咁沉悶，無言。冷麵麵質煙韌度唔夠。

甜品 梨味雪芭及穀物雪糕二選一，我地每人一款，雪芭清新，雪糕無乜特別。

柚子炸雞 套餐唔夠飽，睇食評介紹話好味，所以另外點，普通炸雞一碟。我喺韓國都食過炸雞，但始終唔覺得韓國炸雞有乜特別好食。

晚餐只提供Tasting menu，訂位時可以同餐廳講有乜唔食，例如我朋友唔食牛，餐廳改左碟齋比佢🤣🤣