Foodie 生活雜誌

去高松之前曾經不斷在網上揾餐廳，可惜無心水，上次食過骨付鳥，差d咬唔開，無乜興趣，決定去到瓦町再諗。去到打開tabelog，原本揾到間心水店，點知去到門口至知無開，問對面雪糕店的職員，其中一人的英文好好，我乘機問佢附近有無好餐廳介紹，佢諗左一陣就比左呢間餐廳我，仲幫我訂埋位，揾埋地圖教我去，超好人。我唔餐廳知食乜，只知道係廚師發板全魚晚餐，3500yen左右一位，以食魚為主，問左太后無問題，心口掛個勇字就去。食物一般，唔係特別好食，不過若唔係有人介紹，我絕對唔會去呢類地道小館，係一個有趣的經驗，旅行就係咁，一點點小經歷，加起來就係一個美麗的旅程。

資訊:

魚菜なおり ()

地址 : 香川県高松市古馬場町14-33

電話 : 087-805-2461

但門口在窄巷內，好彩有G神，否則實揾唔到

G神叫我行入去時都有點懷疑，不過我好多時去的餐廳都係比較吊腳，又唔會覺得太不可信

Bingo ! 餐廳在購物街後面的小巷內，無人介紹我絶對唔會來，就咁望過去，餐廳佔一幢樓房

餐廳有兩層，地下除左吧枱，入面仲有兩間房都有客人，廚師好忙，成晚無停手

兩款套餐，2500yen及3500yen，只差1000yen，我點3500yen，其實唔知分別，反正唔係太貴就算。

都係選梅酒，幫太后點左烏龍茶，每次佢都話點飲品唔抵，想攞自己枝水出來。我當然唔啋佢。

前菜 牛蒡

鰤魚啫喱 賣相欠佳，已煮熟的鰤魚加上高湯煮成的啫喱，好濃郁的味道

刺身 質素一般

茶碗蒸，入面都係魚肉

河魚 炸得乾身，魚鰭卜卜脆，好香口，肉質綿滑肥美，似食筍殻魚，好味

清酒煮大蜆  肥美肉嫩

味噌燒鮪魚(?)

最後來個茶泡飯加漬物結尾