Foodie 生活雜誌

今日去觀鯨，聽講在觀鯨季節（5-9月）喺Husavik睇到鯨的機會率有90%，一於參加。太后怕暈船浪，加上喺紐西蘭睇過「咪睇隻嘢突個頭上來再落番水，有咩好睇？」所以佢送完我地船就返上車煲劇，我懷疑若有人問佢冰島有咩好做，佢會答 ：煲劇😓。

當日天陰陰，但好彩海面平靜，無暈船浪，我睇blog有d人遇到大浪，嘔到九彩。我地亦都幸運地睇到鯨 ，好開心。

我地當日無book定任何團，始終唔係旅遊旺季，去到見到啱時間的團就join，碼頭附近有好幾間觀鯨公司，我選了右手邊的一間

即係呢間

趁未出發前四圍行，碼頭附近有個鯨之博物館，因為要入場費，我無入，但係在information center的小姐推介下，我之後去左一個好地方。

館內展品幾豐富，有興趣的朋友不妨參觀

上船了

坐呢隻船

影下張飛先

出發前先在船邊套上船公司提供，又重又厚的全身防風防水衣。

著完套衫成個人笨哂

靚女領隊負責沿途講解

當日好厚雲，好彩無風浪，坐足成個鐘船，一直都係呢個景，呆左。

終於到左觀鯨地帶，各位好努力地用眼睛四周搜索鯨踪

船上可以更上一層樓，上去瞭望台睇，由於我坐唔到船頭，走左上去睇會更清楚，上面好細，只可以企幾個人，好記得有個爸爸比小朋友睇左一陣就提小朋友讓番個位出來比其他人睇，其實仲會有鯨出現，小朋友依依不捨的走了，好欣賞個爸爸，身教真係好重要，教育就係從小開始。實在見得太多霸住個位比自己孩子的家長。當然我都係睇左一陣就落番去

觀鯨區會停左好幾艘船，有船有快艇，船長一發現鯨踪就會全力開船過去，你會見到好幾隻船圍住條鯨。

船種有兩款，分木船同快艇，我為左慳錢 (差價請自行上網上查，我忘記了)，選左坐船，但係一分錢 一分貨，當你喺海上見到條鯨的時候，自己坐緊的船慢慢屹過去，但旁邊的快艇飛快地嗖一聲刷過你船邊，仲可以近距離觀鯨的時候，你就明白到有d錢係要使的。不過話分兩頭，若你坐快艇都要遇著個醒目船長，因為我眼見有幾次我地係快過快艇到達。

大家都係等條鯨上來呼吸，佢噴完水就會潛番落海，隔二十分鐘左右再上來，若有幾條在附近就好開心，但我地當日只遇到一條，所以就要等佢再上來，如是者睇左兩三次就回航。好可惜我已忘記鯨的品種，但好記得條魚鰭係白色的。

第一次觀鯨，見到鯨近距離在船邊游過，雖然我企左喺觀望台，離水面有點遠，但感覺仍然震撼。

回程時有個包加杯朱古力，打發無聊時間

又會傳看鯨須標本睇，鯨須係好似牙咁，用來過濾食物。木偶奇遇記果條鯨魚就係咁食野，長見識了

大約三小時的活動，愉快的經驗