Foodie 生活雜誌

8/2017 光顧

跑馬地係一個富貴得來又低調的小區，無倒模豪宅，呢度唔似中環銅鑼灣，區外客唔多，但居然養得到好多高質素的餐廳及店鋪，可以想像區內居民消費能力極高。今晚來食意大利菜，餐廳氣氛輕鬆，好好生意，平日都滿座，味道唔錯，甜品尤其出色，價錢唔平但份量合理，要知道今時今日好多貴價餐廳份量似餵雀。侍應友善，知我唔識字，好有耐性地解釋餐牌每道菜。我地幾個人share 頭盤，每人一個pasta同甜品，已經無位置再食main course 了。

(由於菜色名字太長，以下所有菜色都係無菜名，只用我自己的文字寫出)

開支白酒，侍應介紹，味道頗甜，少少dry，易入口。侍應話係隔壁同集團的酒鋪賣，價錢係餐牌的7折，我唔識，只見價錢負擔得起就開，埋單時支酒係分單，開公數的人要留意了。

amuse bouche 蕃茄凍湯加cream cheese，少少酸，幾開胃

點左三個頭盤些牙食

burrata cheese burrata cheese 其實無咩味，但我喜歡佢柔軟的質感，配合濃香橄欖油，新鮮番茄及蔬菜，以鯷魚吊味，好有層次感。

八爪魚配亜枝竹及菠菜苗 每次餐牌有就點，呢間用的八爪魚比其他餐廳的大，咬落啖啖肉，更滿足

beef carpaccio 材料新鮮就好食

生蠔Gillardeau No.2. 可能未到季，唔夠肥美

海膽意大利飯 大家都被呢個簽名菜吸引，要知道香港人幾鍾意食海膽至得。飯內有新鮮wasabi同蝦夷蔥，但濃濃的海膽味已蓋過所有味道，飯粒有咬口但唔硬，味道好，份量足，滿意。

busiate trapanesi  配蠔肉、番茄乾、松子及葡萄乾 配搭好有家鄉風味，busiate trapanesi 係電話線樣的pasta ，好有咬口，good

甜品時間，侍應介紹得好吸引，結果點左4款。

先講其間限定桃製甜品 主角係西西里島出產的白桃，比起食開甜度高的日本桃，西西里桃較清甜。分三種做法 : 紅酒浸、sorbet同jelly 。 jelly 入面又有custard ，不同做法帶出不同味道，紅酒味濃、sorbet清新 、jelly 愛甜，真係一桃幾味。

Tiramisu食意大利菜必點。呢度特別在除左一杯滑溜的tiramisu 以外再加杯用expresso咖啡打出來的coffee ice。coffee ice 打成碎冰，每一啖都係濃濃的咖啡味，夾埋滑溜的tiramisu ，好味又有新鮮感。

Almond Granite 用杏仁製成軟綿綿的冰，配上雜果碎，色彩繽紛，杏仁味重，喜歡杏仁的一定愛上。

white chocolate semifreddo 白朱古力太甜，唔係我杯茶，不過賣相幾靚

Petit four brownie 同cookie都好香，配咖啡一流，可惜太飽飲唔落

小店只有十張枱左右，設計簡潔高雅，枱與枱之間的距離剛好，氣氛cozy