2016九州一圈遊遊記篇 Day 4 長崎-雲仙-長崎－Foodie 生活雜誌

今早在附近咖啡店食個簡單早餐後，就向雲仙温泉出發，中途之之坐坐又用左d時間，結果途中又肚餓，路過見到呢間庄屋門口泊滿車，當然唔蝕底又食埋一份。其實係一間類似香港大户屋的食店，但d嘢又幾好味。我點的冷麵好有咬口，伴蔬菜加點肉碎，好清新。團友點的燒魚肥美，燒牛肉都唔錯，一句到尾，食材有水準。小朋友貪得意點左個兒童餐，炸物香口嘢，細路實鍾意。日本食店好照顧小朋友，大部份食店都備有小朋友餐具，呢間更有小玩具任揀，真開心。餐後唔好彩遇到奶奶的迪士尼(即係shopping mall) 根據奶奶講呢間birthday 專賣童裝，平靚正，我唔知係咪，但只知店鋪就在庄屋前少少的對面 (真係只前少少)。各位媽媽有興趣可以睇下。

請注意，奶奶的平靚正可能同平常人有出入

午餐

任選玩具

食店對面的童裝店

奶奶在童裝店經過兩小時地氈式搜購後，終於可以繼續上路，誰知途中又遇到個木牌寫住「棚田百選之里」（棚田即係梯田），當然又要落車影影影，影完再上路，點知經過見到一個正式路牌至知剛才影的並非正確地點，但因為時候不早，唔再停車，直駛雲仙温泉，在回程時再入去影相，但天色已開始黑，影得唔靚。其實景色係唔錯的，不過我硬係影唔出梯田的層次感。回來再查至發現景點係展望台，我結果都去唔到。為左大眾利益，我查左地址，若大家有興趣去，喺Google 入呢個地址啦 :

日本長崎県雲仙千々石町庚棚田展望台

或

<日本網頁資料>

清水棚田

日本長崎県雲仙千々石町庚4574-2

電話 :0957-37-2001

錯誤景點

習慣城市生活的小朋友，快樂地在田野間跑過夠

每塊田都由唔同人擁有

回程時已日落

再影，但已經為雲遮左一半

田畔的河流

呢個係展望台睇到的 (圖片擇自網上)我睇唔到，只緣身在此山中........

經過一段彎彎曲曲的山路後，終於去到雲仙温泉。嚟呢度係參觀雲仙地獄，都係一般地獄谷feel，但遊人唔多，呢度最特別係一條出煙的行人路。路在馬路旁，用木板鋪，地熱從木板空隙升上來，行慢d都有機會燙親，不過好得意。行程可以由清七地獄做起點往山上行，繞半圈至足湯廣場出番來，但我地唔知要行幾耐，所以行到去真知子岩(見地圖)，食個温泉蛋就揸車去足湯廣場，去到又八下向上行，原來好快就行到去大叫喚地獄，所以就算行哂成條路都應該唔洗兩個鐘。我幾鍾意呢度，人少少，地獄谷都頗天然，只有簡單圍欄，唔太商業化。路經幾間旅館都好似唔錯，就如相中的雲仙宮崎旅館，後園正正就係温泉眼，感覺更加貨真價實。各位有時間或者可以考慮留一晚。

觀光地圖