Foodie 生活雜誌

9/2022光顧

食開的蠔店關門大吉，要另覓新落腳點，去開飯網睇到呢間幾合眼緣，即管試下。生蠔選擇多，新鮮質素高，師傅開蠔手勢好，無乜蠔碎之餘仲起埋帶子，一叉就食得，好方便，侍應mark哥服務細心，價錢比之前食開的一間貴少少，但都好滿意，大家決定擇日再食。上網一睇，原來餐廳有好多分店，可能因為係咁，所以能夠貨如輪轉，入多幾款貨都得。不過熟食出品就好一般了。

9/2022 光顧

醫肚要快靚正，我一定揀食粉麵，但粉麵店唔係間間入得，好多都係食到成口味精，所以食到好的要袋住幾間看門口。唔知邊個介紹我去呢間，湯底味道可以，自家製墨丸食到墨魚粒粒，但份量少，一碗得四粒，仲要細細粒，牛筋夠稔，可以入去又唔會伏的店

9/2022光顧

餐廳位置較偏，但粉色加幾何圖形的門面，喺一列刻板辦公室大樓的大街上尤其突出，行過幾次，印象深刻。今次飲左杯手沖咖啡，味道不俗，環境清靜濶落，幾好坐。目測隔離枱的餐點不俗，不過見到開飯網一面倒的食評就有點戒心。

9/2022光顧

朋友仔帶我去食好嘢。餐廳喺小路盡頭，細細間，個名叫大排檔，其實係小菜館。食材新鮮，烹調認真，味道唔錯。餐廳地方細，三張大枱兩張細枱，最好先訂位。

9/2022光顧

好少去旺角食飯，睇IG見到餐廳的生蠔好吸引，即管試下。朗豪坊商場頂樓的幾間半開放式酒吧喺打左藍燈的天幕下，氣氛又唔錯喎。當晚點左生蠔及兩款小食，食物質素一般，不過8:00前有happy hour，係鬧市中一個不俗的選擇。

9/2022光顧

西營盤的食店依山而上，好多小店，今次揀左登山電梯旁的餐廳，細細間，感覺幾有風味。食物味道一般，可能我點小辣，味道唔夠香濃，唔多啱我口味，試過就算。

9/2022光顧

西營盤真係美食聯合國，短短一條水街已經有墨西哥菜、西餐、新疆菜、日本菜、糖水、漢堡，今次揀的墨西哥菜，餐廳裝修窗明几淨，舒舒服服，唔會好似傳統南美餐廳裝飾咁花花碌碌，頭都暈。食物以牛油果為主題，點左大路的Taco、Nachos， 有趣的牛肉湯飯、牛油果雪糕，全部味道都唔錯，除左侍應有點性格之外，各方面都唔錯，可以一試。

9/2022光顧

喺昨日分享的氣餒餐廳食左幾個菜後，雖然唔夠飽，但都要止蝕，唔好再點，之後朋友提議去附近呢間甜品店再續。肚餓又要食甜品時，我最喜歡食喳咋，有多款豆、西米及芋頭，感覺健康之餘又飽肚，呢間整得唔錯，材料煮得夠稔又有椰香，叫做補番之前嗰餐條數。餐廳其他出品賣相都唔錯，花款同好多人龍甜品店差不多，有連鎖店的感覺😆

9/2022光顧

去太子揾食，朋友提議呢間，見幾次行過都大排長龍，對面街仲要開埋分店，心諗應該可以一試。餐廳裝修不俗，坐位唔算迫夾，打開餐牌見到幾十蚊個意大利飯，已知唔好有高要求，但唔要求唔代表無要求，部份食材同烹調技術都唔得，食完後，我同朋友都好疑惑點解有咁多人排隊。

9/2022光顧

多年前來過，印象奇差，覺得係呃鬼佬的餐廳，之後black list 左多年。最近先後聽到兩位朋友稱讚，又試下。今次對餐廳改觀不少，晚餐小菜精緻，味道不俗，價錢合理，地方清靜寬敞，枱與枱之間距離濶，感覺良好。