Foodie 生活雜誌

10/2022光顧

呢一餐去到元朗食已經係一個考驗，我先經地膽食家確認好食，揾佢幫手book位，再揾當地人陪我去(唔知以為去外國😆😆）

10/2022光顧

康城商場又一新食肆，我將佢同樂天皇朝撈亂左，係咁喺餐牌上揾小籠包，點知原來餐廳食星加坡菜。講真，我對呢類連鎖店無乜期望，但估唔到食物味道唔錯喎，餐牌選擇多，點左幾款菜式及甜品都有水準，係康城商場內的一個好選擇。

10/2022 光顧

朋友仔食過話好食，加上當日做緊酸菜魚特價推廣，帶我去試。幾個唔食得辣的人去食川菜，結果都係小辣收塲😝小菜炒得惹味，又唔會太油膩，價錢合理，可以一試。不過味道偏向大路，無傳統的辛辣感。餐廳設有卡啦ok房，隔音極差，當晚有人大唱特唱，鬼殺咁嘈，建議坐遠d。

10/2022 光顧

喺尖沙咀諗緊食乜之際，見到呢間漢堡店。對港式漢堡店的印象係舊式快餐店內，喺一塊大鐵板上煎好的油淋淋版，所以喺入店前都有點躊躇，不過目測其他人的食物唔錯，決定搏一搏（食個包啫，都唔明自己點解咁大心理交戰）😅為左穩陣，點個包就算，因為套餐只提供罐裝飲品，無興趣。漢堡水準不俗，值得支持的本地創作👍🏻餐廳係美式快餐店裝修，一洗港式漢堡的老土感

10/2022 光顧

唔知點解近年對日本燒肉愈來愈無感覺，可能因為頂唔順和牛的油花？反正已好少食，不過朋友話想食就去。懶點菜，點左個二人餐，有肉有飯，三人食都夠。加多碟牛舌，好鬼飽。餐廳提供鹿兒島牛，食材質素ok，但唔算特別好。不過同級數的似乎間間差不多，無話邊間特別突出。

朋友請我食小店出品的「阿嫲花生酥」，食完覺得幾好食喎，又買左幾盒請身邊人食，食完個個都話好食。我平時好少食呢d口立濕，但呢個細細粒容易食，酥皮鬆化，内裡有花生粒、花生醬，花生味好濃。因為無防腐劑，記住兩星期內要食完呀！小店仲有多款糕點出品，上次老闆仔請我食的麻糬鳳梨酥都好食，鳳梨饀新鮮，麻糬軟糯，焗熱來食，酥皮更酥化，拍得住台灣名牌出品👍🏻小店由幾個年輕人落手落腳做，有心有力，祝佢地生意蒸蒸日上🎉

花生酥有兩個size，呢個係大size

10/2022 光顧

靚靚打咭cafe，行有機環保路線，有零售店中店。重點打咭位係裝修成campsite一樣的閣樓，至於餐飲部出品就一般，適合影相的cafe。好處係無趕我走，同朋友傾足三小時，爽YY。

10/2022 光顧

city’super 集團開的餐廳，標榜選用日本產地食材直送，質素應該有保證。餐廳喺糖街新食厦樓上，以木系裝修為主調，一列大玻璃望向維園，好光猛。出品質素唔錯，不過味道較清淡，份量偏少，食價比唔高。

9/2022 光顧

好耐無嚟，見到介紹話餐廳轉左用炭火串燒，出品唔錯，所以來試下。

9/2022光顧

口味比較輕的川菜，可能我點左小辣，辣度不夠，但對於我呢類食唔到辣又想一嚐川香的人就過到癮，嗜辣的朋友不妨點中辣或以上。菜式選擇多，味道唔錯，經開飯網訂位，4位以上有75折，由前菜食到甜品，飲埋啤酒，每人唔使兩舊水，好抵食👍🏻