Foodie 生活雜誌

温泉旅館其實唔順路，純粹因爲上網見到幾靚，特別過來，諗住可以遊覽埋岩手。可惜因爲另一個唔順路的行程(玉川温泉)，搞到夜晚8點至到，未能好好享受旅館設施。旅館係現代化的日式旅館，保留日式風味之餘又加入現代設計，係我喜歡的類型。旅館在河邊，房間有私人風呂，泡湯時望住小河流水，滿山紅葉，好治癒。早晚餐精緻美味，大浴場小巧雅緻，仲有足湯同休憩空間，望住落地大玻璃外如畫美景，係一間令人放鬆心情的住宿。

食完午餐都差不多日落， 趕到玉川温泉已4點，抓緊落日餘暉，快步進入玉川温泉區內的玉川自然研究路。整條路圍住温泉區，全程大概步行三十分鐘左右，沿住温泉河，經過大噴湯，入面就係處處冒住熱氣的火山谷。呢度最出名係岩盤浴，聽講有治療能力，只要瞓喺地上，蓋著被，靠住地熱的能量治病，能夠治療與否我就唔知，但覺得呢個温泉好有趣，要知道好多温泉谷都係欄住不淮進入，但呢度我可以隨意企入去影相，隨處躺下享受地熱，真係未試過，我比十個趣。

來到至知有温泉旅館，若我早知道，一定在此宿一宵。回來上網一查，原來係治療用温泉旅館，好多人喺度長住，有埋醫師長駐。今次只能匆匆逗留一小時，有機會真係想再來。

原本行程只著眼於十和田湖、奧入瀨溪流同猿倉温泉，其他景點都無特別安排。點知昨晚往旅館途中經過蔦温泉一帶，楓葉全部變色，好靚，決定今早來行一轉。沿住棧道走入森林，樹葉全部變成橙色，整個橙色森林場景好夢幻，再往前行去蔦沼，雖然最美麗的見頃時期已過去，但仍然可觀。呢度清晨非常熱鬧，好多拍友都想影日出照住個山的「朝燒」時刻。

猿倉温泉旅館係秘湯旅館，不過自從呢個世界有左互聯網，相信已經再無秘密。大多數秘湯旅館都係由發現秘湯的人喺秘湯旁邊起一間小旅館，之後世代經營落去。通常旅館都係規模較少，服務細心，而且位置偏僻，較幽靜，係我喜歡的類型。

喺酒店一早起床享受完温泉及豐富早餐後又出發。先往発荷峠展望台欣賞十和田湖全景，十和田湖實在好大，但又好似無特別，望兩眼就離開。之後駕車往湖區最熱鬧的地方參觀，陽光出來了，楓葉的顏色亦更鮮豔，圍著湖的山蠻佈滿不同顏色的楓葉，好靚。

今晚入住的酒店位於十和田湖畔，十和田好大，呢度遠離遊客區，比較靜。西式飯店，房間較舊。晚餐係標準西餐套餐，菜色普通，味道不俗。飯店係渡假酒店，有網球場，夏天又可以喺湖邊玩水上活動，我秋天來，可以選擇在湖畔散步，或者坐喺落地玻璃窗前飲住咖啡睇日出，又或者係泡住溫欣賞湖景，完全地沉醉在湖光山色之中。

離開藥研温泉，又要趕車往大間町。大間町以吞拿出名，每年捕獲不少吞拿，來大間町只有一個目的，就係食著名的大間町黑鮪魚，原本打算去出名的浜壽司，可惜去到大間町已經兩點半，壽司店關三點，無謂阻人收工，所以直接去大間崎。印象中有間海峽莊民宿好出名，一見到入面座滿人就立即衝入去，因為三點鐘午市就完結 （其實附近重有幾間餐廳選擇）。飽餐一頓之後，喺呢個本州最北部，影相留念後就離開，大間崎彼岸就係北海道函館市 。可惜是日天氣欠佳，睇唔到對岸。

從大間崎離開時天已開始黑，唯有放棄去尻屋崎。五點左右天已全黑，而且偏遠地方無路燈，駕駛員幾辛苦。加上呢兩日颱風迫近，大風大雨，好不容易至到達八户，去酒店放低行李已經八點幾。立即到附近屋台晚餐，見到其中一間賣燒魚的幾有趣，就入內光顧。當時店內已有4位日本客，佢地非常友善，同我地傾偈又送我地小食，雖然雞同鴨講，但大家用手機又寫又google，居然可以溝通到。原來幾位係來自北海道的漁民，到八户做生意，最好笑是我地想禮尚往來，請佢食燒魚，佢地立即耍手擰頭，話自己係漁民，已經每日食魚食到夠，笑死我🤣🤣🤣 今餐能夠喺地道餐廳同當地人有講有笑，感覺日常，愉快的晚餐。