一向好欣賞張艾嘉，名曲「愛的代價」係我的所愛，擅長拍女性電影，佢所有作品我都唔會錯過，從前的「莎莎嘉嘉站起來」「20、30、40」，到今次的「相愛相親」，不同年齡不同心境，每次描述女性心態都好到肉。今次故事以一次遷墳事件帶出三代女性的愛情觀，不同世代的價值觀及兩代相處的種種問題。從前老一輩對愛情專一，用一輩子守候一段已逝去的愛情，最後發現自己原來一直活在回憶中。中年女子為家庭為生活營營伇伇，早已忘卻生活的熱情，幸好有温柔的丈夫體量，默默支持，重拾愛情。年輕一代則自我中心，合則來不合則去。劇本完整，非常貼地，除了愛情，對傳媒生態、內地官僚主義、年青人夢想等題目都有觸及。故事細膩動人，角色生活化，細節位每每令我會心微笑，喜歡電影的英文名 「Love education」，愛情，係需要不斷經營，不斷學習，無須驚天動地，細水長流才是最難得。
(秋田市民市場，好大個牌，離遠都見到)
自從多年前蔡瀾先生喺旅遊節目中介紹世界各地的街市，見識到街市就係一個地道食堂，更能了解當地人生活的地方，加上近年愈來愈為食，所以經過街市都會行入去睇下。一早落街四圍行，見到市場個大牌，就朝住市場方向去。市場中等規模，蔬菓海鮮雜貨樣樣齊，地方整潔，貨品種類多，幾好行。仲有食店，可以來食早餐，若住車站附近的朋友不妨來逛逛補給。
返回市中心，又入住我熟悉的Richmond 集團酒店 ，設施同其他分店一樣。不是今次酒店地點對於自駕的我極為方便，除左酒店附設停車場外，最好係行前幾步就係Toyota租車公司同油站，方便還車，而且步行5分鐘就係JR站，還車後行過去都好近。菜市場'秋田國民市場'就在附近，酒店後面有商場同地下食街、便利店等，好滿意的酒店。
由於昨晚到温泉旅館已經太夜，今朝要好好享受酒店設施，死唔蝕底賴到最後一刻至走，十一點至起程。即係又無左半日，沿住稱為楓葉國道的341公路往抱返之溪谷。 一路上滿山遍野都係不同顏色的楓葉， 公路都成為景點。停下影下，中途見到田澤湖的牌就兜入去，不過景色普通，我連落車舉機拍照的意慾都無，兩位團友影兩張到此一遊相就離去。
時間浪費了，去到抱返之溪谷已經差不多三點， 抱返之溪谷遊人好多， 沿住山邊窄窄的小路走入河谷，去到回顧之滝就回頭， 沿路欣賞河谷兩岸的紅葉，不過因為河谷比較窄，所望的景觀唔夠寬廣，而且走在溪邊小路，河景都被樹木遮左， 景觀打左折扣。可幸全程路況平坦， 來回唔使一個鐘，非常易行。
温泉旅館其實唔順路，純粹因爲上網見到幾靚，特別過來，諗住可以遊覽埋岩手。可惜因爲另一個唔順路的行程(玉川温泉)，搞到夜晚8點至到，未能好好享受旅館設施。旅館係現代化的日式旅館，保留日式風味之餘又加入現代設計，係我喜歡的類型。旅館在河邊，房間有私人風呂，泡湯時望住小河流水，滿山紅葉，好治癒。早晚餐精緻美味，大浴場小巧雅緻，仲有足湯同休憩空間，望住落地大玻璃外如畫美景，係一間令人放鬆心情的住宿。
食完午餐都差不多日落， 趕到玉川温泉已4點，抓緊落日餘暉，快步進入玉川温泉區內的玉川自然研究路。整條路圍住温泉區，全程大概步行三十分鐘左右，沿住温泉河，經過大噴湯，入面就係處處冒住熱氣的火山谷。呢度最出名係岩盤浴，聽講有治療能力，只要瞓喺地上，蓋著被，靠住地熱的能量治病，能夠治療與否我就唔知，但覺得呢個温泉好有趣，要知道好多温泉谷都係欄住不淮進入，但呢度我可以隨意企入去影相，隨處躺下享受地熱，真係未試過，我比十個趣。
來到至知有温泉旅館，若我早知道，一定在此宿一宵。回來上網一查，原來係治療用温泉旅館，好多人喺度長住，有埋醫師長駐。今次只能匆匆逗留一小時，有機會真係想再來。
原本行程只著眼於十和田湖、奧入瀨溪流同猿倉温泉，其他景點都無特別安排。點知昨晚往旅館途中經過蔦温泉一帶，楓葉全部變色，好靚，決定今早來行一轉。沿住棧道走入森林，樹葉全部變成橙色，整個橙色森林場景好夢幻，再往前行去蔦沼，雖然最美麗的見頃時期已過去，但仍然可觀。呢度清晨非常熱鬧，好多拍友都想影日出照住個山的「朝燒」時刻。
猿倉温泉旅館係秘湯旅館，不過自從呢個世界有左互聯網，相信已經再無秘密。大多數秘湯旅館都係由發現秘湯的人喺秘湯旁邊起一間小旅館，之後世代經營落去。通常旅館都係規模較少，服務細心，而且位置偏僻，較幽靜，係我喜歡的類型。
奧入瀨溪流，東北賞楓熱點，溪流旁的樹葉喺秋天變得色彩繽紛，遊客可以沿住溪流旁的棧道全個行程最擔心的一日。由於其中一位團友於出發前跌傷，唔能夠長時間步行，所以安排上要將就一下。知道沿路可以停車，但又怕車太多無位停泊，準備好幾個方案，好彩最後一切順利，沿路分開幾個停車點，我同駕駛員往回走攞車，團友無需行回頭路。加上天公造美，我總算順利地遊覽左傳說中美麗的奧入瀨溪流。從前東北地方徧遠，奧入瀨溪流係秘景之一，但隨住交通發達，遊人漸多，已經成為青森必遊景點之一，連旅行團都有。
喺酒店一早起床享受完温泉及豐富早餐後又出發。先往発荷峠展望台欣賞十和田湖全景，十和田湖實在好大，但又好似無特別，望兩眼就離開。之後駕車往湖區最熱鬧的地方參觀，陽光出來了，楓葉的顏色亦更鮮豔，圍著湖的山蠻佈滿不同顏色的楓葉，好靚。
香港食食食 (25) 遊世界 (0) 漫步香港 (3) 小書架 (1) 私影院 (1)
