Foodie 生活雜誌

經airbnb訂的住宿，應該係當地人的渡假別墅，平房一層過，兩間房加超大客飯廳，所有家用設施一應俱全。步行五至十分鐘可以到便利店，駕車幾分鐘可到附近餐廳食飯。住宿兩旁係温泉酒店，其中一間提供日歸温泉。民宿寬敞舒適 ，若去松島住宿，係一個好的選擇，多謝團長揀到好民宿👍🏻

一早坐8點出發的JR上仙台，大家都係晨型人真係好，早出發感覺時間好用得多。去到仙台攞車開始自駕遊，先去摘士多啤梨，真係夾下唔同人至有新體驗，我自己排就一定唔會去，但原來又幾好玩，邊摘邊食爽YY。之後去松島，我之前去過，無乜好做，但都叫做有四圍行吓，但團友們行完瑞巖寺食下嘢就算，居然連個海都無望過😅。之後就直去airbnb住宿，晚餐去買七仔搞掂，雖然住宿無温泉，但附近有日歸温泉，作為温泉精的我當然唔放過，浸完終於感覺到開啟旅遊mode了。

事緣我喺雜誌見到有個以白子為主要食材的「痛風鍋」，愛白子的我豈能錯過。餐廳以食貝類為主，年輕廚師掌廚，有板有眼，態度友善認真，點左套餐再追加其他食物，貝類新鮮，但痛風鍋則同相片好有出入。我地好早食，走的時候已坐滿客人，其中一個客人同我地傾偈，仲話餐廳係區內名店呢👍🏻

喺網上訂位後準時到達，侍應先安排喺咖啡座飲杯水，準備好後就入餐廳。一般法國餐廳的高雅裝修，窗明几淨，有天然光，好舒服。侍應有禮服務好，菜單融入不同食材，水魚、白子都有，幾驚喜。食物烹調合度，醬汁配合得宜，味道好，超級飽。食足差不多三個鐘，坐都坐到攰😅一次不俗的經驗。

今日係食完行，行完食，loop 足4次就完😅呢日食左四餐，夾埋用左大半日，最後唔夠時間做我的小電車遊，只停得一個站探招財貓，浪費左張一日券，好彩上天比我坐埋招財貓電車，叫做多個景點。

今日同團友分道揚鑣，我同團友P一組，大家都係晨型人，又喜歡散步，所以一早由民宿行半個鐘頭去食早餐，好舒服。途經上野公園，我無深入地行過上野公園，離遠見到呢舊嘢，唔知係乜？

今次一行五人，若住酒店要分三間房，住民宿相對平點，所以團長訂左呢間民宿。地點喺JR上野站行十五分鐘的民居内，附近有食店及便利店，生活機能唔錯。若坐skyliner從機場來就喺上野站出，其實去完街應該喺JR鶯谷站或地鐵入谷更近。

 民宿裝修簡約，地方清潔，分兩層，有兩間房，但間格特別，介紹聲稱可住八人，若真係住足八人，一定崩潰。當然好似我地咁住五個人係可以接受，但其中一啤要瞓廳，其他人去厠所出出入入好騷擾，我住過就有點保留了。

今次自由行所有行程住宿全由團長負責，我完全無上心，結果連自己坐咩機都唔記得。話說當日check-in，有旅遊緊張症的我一早已到機場，見到check-in counter大排長龍，即時排隊，仲懶勁以為可以讓遲來的團友慳時間，點知埋counter 時，地勤小姐話無我乘搭嗰班機，嚇到我個心離一離，原來我坐OU卻排左HX，而團友們亦不慎有詐，無想過去左N次旅行的人會犯呢個低級錯誤，連約左我喺機場食早餐的朋友都儍了眼，我呢個偽旅遊達人身份終於被揭穿😅

順利去到東京後，去民宿settle down後，食個晚飯，喺上野阿美橫丁行兩行就休息了。

2024東京東北遊 

旅遊日期 (一月尾至二月頭)

今日終於離開江西去廣州，原來龍南市係無高鐵直達廣州，要於深圳北站轉車。去到廣州都係行下食下，無乜特別，餐廳會另出post分享。不過喺廣州去左廣東省博物館，好值得一遊，有興趣行博物館的朋友可以去下。

昨日幫襯過滴滴的司機唔錯，今日揾佢包車一日遊，$300包足一日，算係咁。今日去另一個AAAA級旅遊點 : 關西圍。江西好多客家人聚居，所以有好多圍村，呢個圍村好大型，入面有好多展覽，係一個介紹客家傳統的博物館，內裡有埋餐廳，我地慢慢行都參觀左成個下午。回程時經過橙田，司機帶我地玩摘橙，晚餐食牛肉火鍋，之後去左兩個司機介紹，但我連舉(相)機意欲都無的景點就回酒店休息。

AAAA景區關西圍