Foodie 生活雜誌

4/2021 光顧

近年呢間好湯好麵大熱，主打真材實料湯底，過百蚊一碗麵都大排長龍，香港人真有錢。睇餐牌見餐廳選用高級食材 ： 西班牙火腿、北海道帶子、澳洲和牛，走精品小店路線。點左兩款湯麵，湯底同麵條確實唔錯，今時今日樣樣貴，若用真材實料熬個湯底確實唔平，但湯麵配料味道一般，唔覺得突出。配料追唔上湯底，唔夠和諧，係幾好食，但又未至於突出到要再來，試過就算。

題外話 ： 

湯麵最重要係個湯底。一向認為百幾銀一碗日本拉麵好唔抵，好多都係味精湯，就算加埋塊靚叉燒同溏心蛋，都無理由值呢個價錢。講到湯麵，廣東幫的蝦頭大地魚雲吞麵更多功夫，但價錢卻平一截，其實香港人咁鍾意飲湯，總覺得係可以整到好的湯麵，以前北角的大熱高湯麵就做得唔錯，可惜都係要結業。

玫瑰豉油温泉蛋 普通蛋一隻

黑口黑麵 墨魚濃湯，上枱時附上圍裙，怕食客整污糟件衫，我讚小店細心，對家陰陰咀笑住話碗麵價錢包左。

墨魚濃湯底味道一般，唔覺得特別鮮甜，墨魚滑彈牙，魷魚柔軟，特別在係黑色。

海龍皇湯 點之前其實我十五十六，但見幾枱人都點，一於死跟。湯底真係鮮，配料多，蟹肉、海蝦、廣島蠔、墨魚滑每樣一件，扁陽春麵彈牙索湯，唔錯。全碗麵係贏在湯底，配料質素一般。 又來細心位，附上fine dining feel 濕紙巾抹手。

我話去食碗麵，對家坐低後見到個餐牌窒左一窒🤣

小店有閣樓，一般茶記格局，座位與座位之間距離好近，我當日早去，唔使排隊，若要排隊就咪搞我了。食完出來已經有幾組人排緊。

熱門麵食好快售罄