Petrus@ 金鐘 (二訪)－Foodie 生活雜誌

3/2021光顧

上次食完覺得唔錯，今次帶埋太后來，點左一個lunch set 及一個premium lunch set。 lunch set 保持水準，premium lunch set 好fancy ，睇同食都好開心，再次讚賞服務令人感覺舒服、熱度剛剛好的侍應。

開胃菜芝士波

Lunch set 頭盤 crab

青瓜yoghurt sauce 下面係蟹肉，最底下一層藜麥，食的時候一匙滔到底，鮮甜蟹肉配上清新的青瓜mouse，加入藜麥增添質感。

Lunch set main course lamb leg

通常食羊鞍，今次試下羊腿。大鄉里地以為係一隻脾咁上，點知原來係牛柳咁款，肉同筋混合一齊，肉質無羊鞍咁嫩，但仍算柔軟，肉味頗濃，我覺得唔錯。但太后唔多欣賞，我換左我碟牛比佢。

Lunch set 甜品 Floating Island

無乜印象，好普通的甜品

Premium lunch set 頭盤 Foie Gras

好似kinder出奇蛋咁，一道菜有三樣嘢食，好開心。花瓜terrine用白味噌、brown sugar 及sake 醃製，味道清新輕盈，減淡左鵝肝的濃味。

蛋殼內係鵝肝mouse，混入cinnamon 、honey及梨肉，味道香濃幼滑，配合烤得綿香的麵包，好睇又好食。

Premium lunch set 頭盤 Endive

Endive即係苦白菜，真係食西餐學英文。呢個頭盤係素菜，兩款苦白菜兩種做法，先用煙燻，上枱時用個玻璃罩罩住，感覺大笨象。

分兩層，擺盤贏哂

薄薄的Endive夾住洋蔥蘑菇泥，鋪上薄片白蘑菇，灑上菠菜做的powder，配黑松露蘑菇汁。食材高質，菜有菜味。

另一款係Radicchio，我覺得似紫椰菜，椰菜層層夾著松露及parmesan cheese，豐富的口感，食落居然覺得有d似食肉。

Premium lunch set 可揀4 courses 或 5 courses，我揀左4 courses，之後另加餐廳的簽名菜 : 紅蝦。鍾意食紅蝦鮮甜肉嫩，最重要係蝦頭好多膏，好正。上枱時見到大大隻的紅蝦好開心，點知當日的蝦頭無乜膏，乾爭爭，有點失望，都明白肉眼係睇唔到多唔多膏，唔關廚房事，只好嘆自己唔好彩。侍應問我好唔好食，我照直講，佢話同我反映，心想反映有鬼用咩，都食左啦，我只有笑笑口講聲唔該。點知佢轉頭揾左個鬼佬經理過來，又要講英文，頭都痕，最後我只聽到佢話整多隻比我。