Foodie 生活雜誌

Plan 行程時見到Aarhus除左AROS art museum 同DOKK1 之外，我都唔知有乜好做，睇資料見到附近有個大城市Aalborg，離Aahurs約一小時車程，就過去行下，做一天無計劃的旅行。去到第一件事係揾餐廳食lunch，今日有食神，揾到的餐廳麵包好好味啱哂麵包痴温柔媽。餐後去左幾個旅遊網介紹的景點，慢慢行下睇下，小朋友無所謂，有得跑跑跳跳就開心，就咁hea下又過一日。

一早同少爺仔去附近跑步呼吸新鮮空氣

沿住小水塘跑，香港點會有呢個環境？

跑完番住宿沖個涼出來就有嘢食，明白點解上等人可以咁易keep fit

出發去Aalborg，路邊見到無人檔口有新鮮士多啤梨賣，放低錢攞一盒走，之後就係惡夢開始，原來士多啤梨上有好多好細的蟲，結果爬到個個成身都係，連架車都有，幾恐怖。後來見唔痕唔痛，反正殺唔哂，就由得佢。最後盒士多啤梨當然成盒掉左。

Aalborg市內漫步

丹麥小屋

好有氣質的toilet

ANNO 1506 一座古老建築，有無人可以指教呢個一級級的屋頂設計的意思？我見好多丹麥建築都用呢款屋頂

Aalborg Kloster 後園

好羨慕新一代享有三文兩語的教育環境，從小就可以學好英文，睇書的選擇更多，睇下幾個小朋友，隨手就可以喺書局補級小說，羨慕。我一本都唔識睇。

午餐揀左大街上的PENNY LANE，似係有點歴史的餐廳，室內設計幾有趣，有壁畫，又有用杯碟碎片做成的吊燈，仲有堆滿多款麵包pastry的櫃位，好吸引。

唔係幾睇得明餐牌，求其知係牛肉豬肉就點，來到見到全部係cold cut 配麵包，煎三文魚都係微暖，不過麵包有麥香，口感煙靱，真係幾好味。中間一杯係接骨木花凍飲，清甜解渴，全程都係點佢。

洗手間設計好有心思又有型，男女厠格內的潔具一紅一綠，好sharp 醒

budolfi Kirke 教堂 若你睇慣西歐的教堂建築，會發覺北歐的教堂建築比西歐的多樣化得多，設計感較重。不過今次呢間係傳統樸實型，好少雕刻裝飾，又係另一種感覺

相比西歐的教堂，北歐的教堂內部裝飾亦比較簡潔，特別之處係會有航海設備的裝飾，例如古時侯的帆船，可能跟祖先係維京人有關？

夏日炎炎，好多小朋友除哂衫喺度玩小噴泉，我同少爺仔都左穿右插，濕左至算，好好玩。

Aalborghus slog  好簡單的城堡，唔講都唔知佢係城堡。好處係有一個大大的草皮斜坡比小朋友跑。

Utzon Center 建築物在海傍，建築師Jørn Utzon 的最後作品。入面有gallery同餐廳，不過我地去到已關門了。

行左一日，返回住宿焗一盤大雜燴，有肉有菜，簡單一餐