Foodie 生活雜誌

經過第一日的轉機日，第二日的休息日，第三日終於展開旅程。早上先喺農莊行個圈，接觸大自然，之後就出城去藝術館同圖書館。當初睇ARoS Aarhus art museum 的資料係被佢屋頂的彩虹走廊所吸引，對藝術毫無認識的我，諗住喺藝術館行兩行，扮下文藝中年就走，點知原來展館又幾多嘢睇，仲要唔小心帶左兩位少爺入色情展館，笑死左(詳情請看內文)，結果唔小心又無左半日。

租屋的好處係有廚房，早餐可以來一碗湯通粉

農莊在住宅區的外圍，有菜田，雞鴨羊豬欄，仲有養蜂箱，每樣有dd，應該係自給自足，共享資源的概念，不過眼見規模較細，可能仍在發展中。相中係鴨棚同蜂箱的所在地，不過鴨仔見到我就走，我見到蜜蜂就走，所以只影到個草地，草地在水池邊，對面係菜田同豬羊屋企。

一片大菜田，種左粟米、蔥、羽衣甘藍等日常食用蔬菜。

農莊大，不過對當地人來講，佢地覺得每個地方距離都唔遠，每次話近的地方我都行到腳遠，可能同佢地對腳長有關。但對於呢對哈比人，更加遠。

到訪山羊的家

行過羊欄，正在介紹比小朋友，有村民路過，佢叫我地入去羊欄玩，只要緊記出來時關門就好。趁呢個機會亦教小朋友，去旅行時不妨主動同當地人溝通，發掘趣味，不過最緊要守規則，做個好的旅遊人。我大唔透，帶領小朋友同羊仔玩。

村莊中間有社區會堂、有機食物用品商店，不過我行左四日都無見過有人，可能太早😅

小朋友旅行，未必一定要去樂園，我要求少爺仔影六種不同的花果，一來可以比佢有細藝，二來都想佢藉此留意下四周的環境，佢好用心影呢。我之前比左部舊相機少爺仔，鼓勵佢旅行時影低自己喜歡的影像，我地再一齊分享，因為影像都係表達自己的一種方法，我希望從照片中了解佢睇嘢的角度。

正打算番大屋準備外出時，發現池塘邊有個大彈床，大人細路都脫鞋上去玩左一陣，笑聲震天，大人怕傷筋骨，玩一陣就停，小朋友玩到唔捨得走，年輕真好。

終於起行去藝術館，到達時已經中午，藝術館好易認，見到屋頂個彩虹環就係

藝術館正門，設有室外付費停車場

午餐時間，當然先醫肚，餐廳有好多植物點綴，感覺清新

IKEA feel餐飲，食物認真麻麻，就算我點個chef selection 都無補於事 (左邊大圖)。

餐後第一個參觀的展品當然係彩虹走廊，咪睇好似好靚，其實大熱天時，太陽哂到入面好焗

屋頂晀望Aarhus市中心

天台公園

少爺仔同老闆仔當然無興趣，睇兩睇就食雪條。兩位食緊的係接骨木花味雪條，丹麥好多接骨木花味食品，接骨木花喺歐洲人的民間藥方，其中一個用處係預防感冒，味道清甜，所以喺呢個旅程中我地係咁揾接骨木花的產品，可惜呢支雪條只喺呢度出現過，之後都遇唔到了。

藝術館內望

地下仲有一層

展館入口的作品 portable cities Aarhus，用衣服碎料做成的城市，有埋藝術館的造型，好精緻，展品放在行李喼上，名乎其實的portable cities ，注意，藝術家係中國人呢

館內每個樓層都有一個展館，展覽不同主題的藝術。先睇 human nature : 以多個主題表達藝術與人類的關係，藝術展品歴史橫跨二百年，睇完好似經歴左一個藝術時光之旅

Art and Porn 呢個展覽真搞笑，話說我帶住少爺仔同老闆仔一齊入館，入去之前太太已提醒我展品有色情成份，怪只怪自己唔識個Porn字，入到去見到展品大吃一驚，唯有拖住兩條友急急腳離開，其間為免佢地四圍望，係咁叫佢地望地下，不過途中難免抬高頭睇，只聽到二人係咁好似三眼仔咁發出 wow...wah...的聲音，我更加急步拉住佢地走，諗起都搞笑。將兩位交番比佢地父母之後，我當然再入去睇，真係大開眼界👍🏻

Far from home 老闆仔係MARVEL迷，猛咁叫話要陪我入呢個館，以為佢咁有藝術細胞，原來佢以為館內播緊spiderman 最新嗰套far from home 決戰千里，笑死我。

其實展館內有著名的藝術品 ： Boy，一個高4.5米，像真度高的男孩雕塑作品。

5 1/2 樓，令我想起Harry Porter 的 9 3/4 月台

最低層的展館主題 : Tomorrow is the question 想起香港的問題，令我對題目無限唏噓。幾位小朋友當然係拿拿聲開始打乒乓波。

Teamlab近年大熱，連丹麥都見到佢踪影