1/2019光顧
餐廳以前在佐敦，在想食名單上停留左一段好長的日子，但一直揾唔到食友，近年終於有班為食鬼陪我四圍試，即時訂位。餐廳開在跑馬地的大厦內，就在名餐廳Amigo 附近，晚上好清靜。餐廳裝修清雅，以私房菜形式經營，可以同店方商量菜單，定好價錢再訂位。每道菜式都係心機菜，食材揀手味道好。
題外話 ：上次係咁二幫下朋友手煮餐團年飯，至明白要認真地煮一餐飯係有極多工序，廚師係幾咁辛苦，之後我遇到好的餐廳真係更用心食，亦唔敢隨便批評，因為每煮一餐都真係唔容易。
餐廳在跑馬地大厦內，晚上靜悄悄，餐廳分兩層，係內置複式單位，入門口一層有四張枱，樓下係房間、廚房及洗手間，我地坐樓上大廳。
晚餐菜單
陳皮蒸鮑魚仔 鮑魚算大隻，火喉剛好，軟靱適中，配陳皮及豉汁更香
茶燻雛鴿 雛鴿骨軟肉質鮮嫩，茶味濃郁，可惜每人只得四份一隻，真係想食多隻
西班牙黑毛豬叉燒 唔係一般的蜜汁叉燒，係炭燒叉燒，更香口，肉質柔軟彈牙，好味，旁邊的醃漬蘿蔔味道好清新
花膠螺頭燉雞 呢個湯我好欣賞，熱度夠，好鮮甜，一滴油都無，湯料都好美味，我全部飲哂食哂。
香醉紅蟳 呢道菜係我最期待的。見識淺薄的我喺菜單上點都揾唔到個蟹字，一問之下，至知原來紅蟳即係蟹，又學多樣。呢味陳年花雕蒸蟹加陳村粉真係好好味，花雕香，陳村粉滑，蟹肉鮮甜蟹膏滑，蒸好後蟹的鮮味同花雕融合，與陳村粉伴食，一流👍🏻我估好多人都同我一樣好唔捨得d汁，所以侍應醒目地留起用來拌一陣上枱的蝦子麵
隋王斬肉 就咁睇名都唔知係乜，睇英文至知係慢煮肉球，似食清湯獅子頭，肉質軟綿滑溜，雞湯清甜，不俗
沙薑焗雞 標榜新鮮手切沙薑，唔覺好突出，雞肉剛剛熟，幾嫩滑入味
魚湯浸時蔬 魚湯鮮甜，豆苗嫩，好味
蝦子蝦油葱油撈麵 葱油香，麵爽口，撈埋之前的蟹汁，正👍🏻
椰汁棗茸糕 質感軟糯，有咬口，棗味香濃
花雕紅棗飲 估唔到係凍飲，甜甜地，完美的結束
留言列表
香港食食食 (25)
