4/2018 光顧
香港雖然有好多鮨店，但合心水的就唔多，而家間間餐廳都話提供Omakase， 一餐飯動輒過千，唔係咁有閒錢四圍試。對於鮨店，我好重視食材，處理手法亦希望有點心思，我死心眼，通常試過好食的鮨店就會一直幫襯 (只限鮨店)，跟死一個師傅，直至覺得唔合心意再轉。師傅Mori san我之前跟左幾年，由佢打工到自立門户，後來因為餐廳太忙，感覺有變，加上習慣左個風格，想轉下新口味，所以又四圍試下。最近鳥倦知還，加上餐廳再改革，回歸基本，由Mori師傅獨自主理，更專注，用料更精。午市只得兩款套餐，壽司set ($750) 及 刺身壽司set ($1500)，兩款都係Omakase，晚餐只提供Omakase ，$2200一位起跳。食材新鮮，種類多又特別，用上更多方法處理食材 (例如熟成、醃漬等方法) 將味道再提升，無以前咁花巧，反而更舒服。呢餐食到時令食材如鳥貝、生蠔，又有可遇不可求的葡萄蝦 (三款都係套餐以外另加)。久別重逢，好滿意的一餐，又可以再繼續光顧了。
餐廳門面低調，之前一間變兩間，而家又回復一間，差不多兩年無來，有點再見舊友的感覺。
午市只得兩款套餐，壽司set ($750) 及 刺身壽司set ($1500)，兩款都係Omakase
餐廳內有一張可以容納12人的壽司枱及一間個室，設計高雅中見細節
食材用木盒盛載，保存於冷藏櫃內，温度剛好，唔存在冰感同風乾的問題。
餐具雅緻，Mori san喜歡餐具，買買埋埋在店中使用，用餐時更開心
自家醃的薑，帶點辣
壽司用赤醋飯及醋飯，以配合不同刺身
蒸蛋又甜又滑，內容豐富，有雞有魚。
金目鯛 今餐所有魚都係野生，食落有魚味
深海池魚
醋鯖魚 加上白昆布及紫蘇，我始終唔太喜歡呢種酸中帶腥的味道。
手釣池魚
牡丹蝦 用昆布醃左一晚，肉質更甜，柔軟黏口，同平日的鮮甜感覺不同
赤鯥
櫻鱒 又係軟綿綿的口感，用醬油漬處理後，肥美感更突出
響螺 充滿海水味，好爽口
九洲紫海膽 通常食北海道海膽，無想過九洲海膽味道都可以咁濃郁鮮甜
中拖羅 醬油漬，見外皮以為係煙燻過，原來係用熱水拖過，食的時候再火灸外皮，講真，係好肥美，但我又食唔出處理過的外皮有咩分別
拖羅 睇見都開心，入口有溶化感，但油脂唔係好豐腴，有少少筋
北寄貝 肉厚鮮甜，very good
大尾魷魚 好厚身，肉質黏糯。師傅話係春天產卵的大魷魚，所以特別肥美。
鳥貝 我最喜愛的貝類，加上合時，好鮮甜 (加點)
小長井蠔 好多時喺香港餐廳食的日本蠔都好creamy ，但喺日本食的好多都爽口鮮甜，搞到我都無信心再喺香港點日本蠔。今餐食的小長井蠔，鮮甜爽口，酸醋做成啫喱狀，賣相更靚。
葡萄蝦 其實本來係提供比Omakase 套餐的客人，但我一見到已經立即兩眼放光，即點！要知道葡萄蝦可遇不可求，多年前食過一次，對其鮮甜中帶彈牙的肉質念念不忘，同牡丹蝦唔同，牡丹蝦肉質較稔，花竹蝦又唔夠鮮甜，除左Omakase 的食客之外，其他食客見到我個猴禽樣，都問我係咪好好食，結果一人點一隻，幫Mori san清倉 (因為是日來貨10隻)
小肌
八爪魚 用醬油醃過再焗香，柔軟入味
麵豉湯清甜
飯後甜品可選生果、雪芭或咖啡，是日生果係蜜瓜，當然選生果，清甜多汁，完美的結束。
留言列表
香港食食食 (25)
