Foodie 生活雜誌

東北的冬天晚上5時已入黑，路上無街燈，對於習慣滿街光亮亮的香港駕駛員，實在不習慣，立佞武多館至餐廳車程要兩小時，天雨路滑，實在唔敢開得快，結果都遲左半個鐘，不過我中途有致電通知，店主都體諒。

終於去到精緻的法式小餐廳，今晚點選的晚餐係台灣同日本北東北合作的「食采陸奧」計劃內其中一個套餐，以當地食材青森帆立貝及蘋果為主要材料，創作不同菜色，有火鍋，燉飯、甜品等等。法日合拼，味道不俗的一餐，很好的飲食經驗。有興趣一試的建議先預訂。

資訊 ：

French&Italian agréable

地址：青森縣陸奧市小川町2-17-1

電話：0175-23-9114

餐廳係一間小屋，感覺好温馨

室內裝修以木為主，似歐洲小屋

有暖爐，東北嚴寒的冬季絕對用得著

雖然當晚全間餐廳都無客人，但我地仍被安排坐樓上的房間

菜單

一進內，火鍋已預備好

梅酒係每餐必點 

配火鍋食用的十六種配料，牛油、咖哩粉、松子都有，每款少少，自由發揮，放在小碗內，好骨子

醋漬蘋果薄片 開胃菜，有三款蘋果，分別切片及做成蘋果茸，酸酸的刺激味蕾

二人份的一碟大帆立貝，(我地四個人，有兩碟)帆立貝非常新鮮，鮮甜肉厚，可以放湯稍為灼熟，又可以直接以刺身食，未試過一餐食咁多帆立貝，好滿足

鍋內清湯以大量乾貝及鰹魚煮，非常鮮甜，內裡早已放入釀了帆立貝群邊的肉丸

蔬菜無限添加，不過切得好碎，似食生菜魚肉湯

帆立貝燉飯 火鍋食得差不多就送上，大大的帆立貝用牛油煎香，火喉控制得宜，食落鮮嫩肥美，燉飯即係意大利飯，用上湯芝士牛油燉好，再搓成小球，外面稍為燒香，配上味噌，有點似食飯團，不俗的西日配搭。主廚有提過留少少加湯加味噌做泡飯，但我掛住食，食完至記得

烘烤紅肉蘋果 大大個蘋果開邊烤軟，上面放上云呢那雪糕，配上甜甜的醬汁，口感有點似食烤布丁，簡單但口感好豐富，好味👍🏻

最後以一杯花茶作終結，飽到上心口的一餐，想跑番酒店作心理補償，可惜認唔到路