Foodie 生活雜誌

3/2017 光顧

著名的華嫂冰室，聽講食個菠蘿包都要排個幾鐘，仲要在屏山，山長水遠，所以從無參予。咁啱觀塘開左分店，某日誤打誤撞去左佢在工廠大厦內的外賣部，完全無人，所以買左個包，覺得水準唔錯，的起心肝去觀塘分店食。食物出品真係唔錯，食材認真，整得有心機，係有質素的茶餐廳，但值唔值得要排成個鐘？我個人就甚有保留，分店當然都係排隊格，不過我一個人，加上唔係繁忙時間，通常15分鐘內有位，呢個係我可接受範圍。

講開又講 :

有朋友會問我點解無食平嘢，例如茶餐廳。首先我真係成日食平嘢，但係唔通食串燒賣都po上來咩，實比人嬲豬或unfriend，其次係我覺得茶餐廳並唔平，但好多時遇到的都係食材求其，流水作業，感覺物非所值，所以我好少幫襯，寧願回家煮碗麵。（若大家有好介紹麻煩單聲）。

芝士咸牛肉蛋豬仔包

豬仔包軟屬，咸牛肉同芝士融為一體，隻蛋一咬有蛋汁流出，整體好豐富，好滿足。外賣紙袋夠厚，keep到warm，值得一讚。我好怕食外賣，就係怕keep唔到質素。

雞翼肉眼筋煎蛋冬蔭公湯米線 

雞翼入味，肉眼筋肉厚，米線有咬口，不過冬蔭公湯較單調，只有酸辣味，整體唔錯

秘製撈米線 (觀塘限定) 

邪惡撈米線。因為用左餐肉同紅腸，呢兩樣都係超級無益但我又十分喜愛的食物，好彩有青瓜芫茜同芝麻平衡下，稍稍減少罪惡感，再加上豬扒，配料全部切粗條狀，厚厚的好有口感。加入自家調味醬汁（稍甜又厚身的豉油）成碗米線熱鬧又惹味，食得好開心。