Foodie 生活雜誌

(餐廳開在灣仔街市內，門面低調，裝修簡單，心思都放在食物上。)

9/2016 光顧

我用左一個食快餐的時間食左一餐法國菜。話說原先諗住隨便食餐飯就去賞花燈，朋友的朋友話上次經過入去食過飯覺得唔錯，朋友就隨便地話去食，去到門口我就記得呢間餐廳唔多隨便，叫朋友睇左餐牌先入去，但朋友話既然來到就食，結果我用左落樓下食飯的心情在一小時內食完呢餐fine dining 。餐廳serve 的係新派法蘭西菜，擺碟精緻，碟碟都係一啖起兩啖止size，食材新鮮，配搭頗新穎，但我實在無時間細味欣賞。

經過今次，發現自己係無做上等人的素質，食物雖好，但原來食餐好除左食物要好，仲要有時間同心情，正所謂愈是期待愈是美麗，我呢d窮鬼食餐好要一早沐浴更衣ready 定，咁樣貿貿然地食餐好，真係唔習慣。其實餐廳食物質素不俗，有機會想再來。

串燒青口細細串，用味噌加芥辣做醬，幾香口

聖子聖子起肉切粒，配上椰菜花橘子同辣椒仔汁炒，口感豐富，賣相靚靚，但你問我就喜歡蒜蓉蒸囉。

八爪魚大大件，煮得軟熟，睇餐牌學英文，原來個煮法係叫 Josper,即係用個好勁的炭爐grill，上面鋪上蟹子，配個濃味噌汁。仲有舊子薑皮蛋伴碟，有趣的配搭

beef tartar 只記得好味

煙肉焗薯 好香口又好食，今晚飽肚之選

和牛 日式配搭，紫菜加金菇，夠日本之餘又簡單。話說點呢道菜係因為我問侍應有咩比較飽肚，佢好有誠意地介紹我食和牛，朋友二話不說話好，

侍應仲細心地怕我地唔夠食，提議點兩份，我亦立即9秒9話唔洗，5舊水細細舊，咪玩啦，我諗住來食快餐咋。

點左個小童餐，簡單的煎魚柳白汁意粉，好味又飽肚。

兒童餐甜品 似放大版macaron 香得來又唔太甜