{前言}今次旅程共十五日,自駕遊在九州粗略遊一圈。因為有小朋友同行,要輕輕鬆鬆唔想趕,沿途食下玩下就算,所以行程每日只有一至兩個景點,其餘就隨遇而安。今次一班為食貓用左好多時間採購食物,所以去的景點唔太多,若打算跟住我個行程走的話,或者可以考慮多加景點或減少日數。

{行程大概} : 福崗入,停一晚後第二日取車開始自駕。沿途遊佐賀、長崎、鹿兒島、宮崎、大分。最後返回福崗,再遊福崗周邊地方。(熱門的熊本阿蘇因為之前地震關係所以無去)

{住宿} 今次入住的酒店有MyStays 、Richmond、JR 、Best Western 同UNIZO ,另外兩間温泉酒店。除左Best Western 較殘舊之外,其他住宿都好滿意。

{食 } 今次完全無訂任何餐廳,只係在當地問酒店、睇tabelog或者去到睇雜誌揾食。早餐通常在高速公路休息站解決。結果都遇到幾間唔錯的餐廳。

{交通 }: 今次旅程照舊乘坐HK express ,航班出發及回程皆準時,但回程時行李delay。全團一行四大人一小孩,選擇車種係Toyota的VOXY,坐得舒服又多空間放行李。沿途多數行高速,車程頗長,而且好多時隨心而行,有時會走回頭路,所以路費較高,全程共用左約33000yen路費。油費約20000yen。

福崗機場離市區不遠,約20分鐘車程左右,若四人同行,可以考慮坐的士,車費約2500至3000yen ,咁就唔洗由國際線坐巴士去國內線再轉地鐵,雖然花多少少錢,但係就舒服好多。

{通訊} 去日本我一向用電話卡,今次去15日,用中移動(20G)及中聯通(5G)電話卡各一,每張7日,我用iPhone ,一插即用。不過中移動一到第7日的2359hrs 就到期,中聯通就用到第8日都仲用到,第9日至停。但兩張今次表現都麻麻,速度較慢但可接受。不過之前在其他地方用係唔錯的。今次車上的GPS出左小問題,結果都要Google map幫手。

{天氣} 夏天去旅行預左熱,但估唔到九州又唔係太熱,雖然太陽極悪毒,曬得皮膚灸痛,最好担番把遮。但係一走到樹蔭下就會涼風習習,早晚天氣稍涼及乾爽,唔錯。

{總結 } 雖然係暑假,但九州四處都唔係太多人,最多人的地方應該係湯布院。整個旅程我最鍾情係鹿兒島同高千穗,鹿兒島充滿渡假氣息,而且旅遊點多,我今次只去左霧島同指宿,若要遊匀整個鹿兒島加屋久島,相信最少要一星期。高千穗的神社、天安河原同高千穗峽都好有特色,值得一去。

{其他} 機場國際線離境過關後有手信店,不過唔大,熱門手信三寶 : 卡樂B三兄弟薯條,La Tao cheese cake 同Royce 朱古力都有。不過小食店只提供簡單餐點,如三文治或烏冬等。要食好少少可能要在外食完至過關。(我直入過關,無睇過機場的餐廳)

 

文章標籤

全站熱搜

Hearoom 發表在 痞客邦 留言(2) 人氣()