2016 曼谷遊餐廳篇 OSHA Bangkok@ Pholen Chi－Foodie 生活雜誌

近兩次來曼谷都有食餐fusion 菜，無他，一來時興，二來價錢比香港平一截，而且好的fusion 菜就似去經歷一個美食之旅，用餐期間，對每道菜都會有期待有驚喜，好開心。今次的餐廳睇個門口都知浮誇，入到去直頭似坐在夜總會，金碧輝煌，天花幻燈片不停轉換影像，配合氣氛。

咁主角當然係食物，唔知頭唔知路的時候，我會點set，起碼係廚師最耍家的簽名菜，應該唔會死錯人。結果呢餐大家都好滿意，西泰合一，西餐材料加入泰式醬汁與配菜，味道有新意，加上別緻的擺碟同整個餐廳氣氛配合，不俗的一餐。侍應帶我參觀餐廳，離開時幫你call 埋的士，服務一流

welcome drink 無酒精sparkling wine 靚靚

開胃小食 : 酸汁豬肉，普通前菜，放落隻羹，換個塲景，成件事唔同哂

生蠔配泰式海鮮汁，酸辣sauce配上海水味，又幾match，友善的侍應特別提我粉紅色的海鹽唔食得，雖然我都知，不過都搞到我神經質地之後每碟都留意佢講邊樣食得邊樣唔食得

前菜睇樣都開心。花花春卷，顏色靚，味道清新。帶子睇顏色以為係三文魚，味道鮮甜，酸汁加橄欖油，好開胃。咸蛋黃魷魚，夠香口，色香味俱全的前菜combo

海鮮湯蜆同蝦都新鮮彈牙，但個湯味道怪怪，似咸甘桔味

主菜黑毛豬扒頗鬆軟，配上平時食豬頸肉點的辣汁，加埋伴碟的野菜，野菜款款味道同口感都不同，似神農氏嘗百草(問過，除左墊底塊葉外，全部食得）味道好食完後問我飲唔飲菜，靚靚TWG禮盒裝茶罐show 出來揀，埋單至知另計，窮人如我就覺中伏，不過今次伏得開心，因為令整個晚餐更圓滿又有趣。配埋小小一盅紫米飯，帶點椰香，泰西合壁