Foodie 生活雜誌

2016瀨戶內海一圈遊 行程簡報 (以下費用全部以日元計算)

 因為想睇瀨戶內海國際藝術祭，所以促成今次行程，由於從廣島機場出入，所以決定八天自駕遊行程是圍著瀨戶內海走一圈。

 {行程}: 廣島入，經過由七條大橋連接而成的西瀨戶自動車道至愛媛及高松。之後由高松出發，遊直島及小豆島後回高松。再從高松經瀨户大橋至倉敷及尾道，於廣島機場離開。

 {住宿} 今次分別入住兩間經濟旅館，一間民宿，三間温泉酒店，及一間特色酒店，之後會再與大家分享。

 {食 } 出發前做左資料搜集都揾唔到有興趣的食店，加上今次有部分時間留在小島，選擇唔多，不過最後都食左不少美味的食物。注意小豆島與直島的食店大部份下午四時關門，星期日更休息。旅遊區如倉敷或宮島等店鋪關門時間為六時左右。若係自駕，於進入城市前外圍有好多食店選擇，味道都不錯。

 交通 ： 今次旅程乘坐HK express 到廣島，除左出發前航班時間改左三次 (其實係愈改愈好) ，其他問題不大，航班出發及回程皆準時，滿意。今次旅行一行四人，選擇車種係Toyota的sienta，之前曾經租過，貪其空間夠大，尾箱可以放4個26吋行李後仍有空間，坐位濶落。不過車身較高，部分停車場不能停泊，但問題不大。今次自駕的交通費稍高，首先因為大部份時間行高速，路費貴，由廣島至道後經7條大橋已用去7000，全程共用左約17000路費。其次係連人帶車上直島及小豆島的船票，車輛不同長度不同收費，今次駕駛的車長4.2 m，要買車長5m以下的票，車輛連司機每程費用係5400，行程中要坐幾段船，所以貴用又增加左。不過係值得的，因為兩島都頗大，島上只有巴士，而且班次疏落，加上今次參加藝術祭，要四處揾展品，駕車方便得多。若體力許可又天氣好，在島上踩單車絕對係一個更好的選擇，因為沿海而行，好舒服。

 其他 : 廣島機塲離市區約一小時車程，因為唔想走回頭路，所以行程的最後一晚我選擇住尾道。機場離境大堂有好大的手信店，3樓有數間餐廳，過左immigration 繼續有熱門手信三寶 : 卡樂B三兄弟薯條，La Tao cheese cake 同Royce 朱古力，包你財散人安樂。