1/2015 光顧

經過太安樓,入去貢下。見到有好多小店,又有小食,仲有好多老店,好似時光倒流,童年感覺番哂嚟。當然有埋某「名DJ」介紹過的雞旦仔,但無興趣。行左個圈,被呢間海南雞店吸引。$25碗飯連湯,平到嚇親,見前面排隊的小姐果碗豐富咁多,原來加$5有埋腎,梗係死跟。所有人都係買外賣,問有無堂食,佢引領左我入隔離鋪的角落位,我見到個位笑左出來(見圖) ,但總好過去公園食。雞無雪味,起埋骨,幾滑。油飯都唔錯,軟硬適中,又唔太油。但我最欣賞係碗冬瓜清雞湯,清甜無味精。老闆娘同我吹水,話日日劏咁多雞,大把雞殼煲湯,點使落味精!$30食到呢種質素,抵到喊,估唔到今時今日香港地仲有呢d鋪頭。

地址 : 西灣河筲箕灣道57-87號太安樓地下A32B號舖。

$30, 幾豐富呀,一般外賣碗size,我就好滿意,不過就唔夠飽。
 
飲完個湯,杯底仲有冬瓜呀,真材實料

  

我就係坐櫃面後面個位

似小時候小朋友跟呀媽看檔,坐埋一邊做功課的位

    

唔係繁忙時間,但都好多人排隊㗎,不過師傅手腳快,唔使等好耐。

  

 

  

 

 
 

    全站熱搜

    Hearoom 發表在 痞客邦 留言(0) 人氣()