Foodie 生活雜誌

入去餐廳之前都知道係簡單食物，有益organic之類，但當我見到上枱時只係將個番茄同個牛油果切片後再鋪上塊麵包時，我真係有點納悶。堅係認為自己呢個智障廚房都識整，有時去得餐廳，點都希望食d屋企未必會整的食物，未必一定好複雜，但都應該用腦諗下，例如切下蕃茄碎或做下牛油果醬，可能我就係唔適合咁基本的餐廳吧。

12/2016光顧

一間我會回頭的咖啡店，咖啡香濃幼滑，食物質素好，簡單但製作認真，呢度又似咖啡實驗室，時時有期間限定不同配搭的咖啡特飲，次次去都有新鮮感（有部分原因係我幾個月至去一次）好似今次的聖誕限定pancake，又靚又好食，加杯咖啡特飲，好開心。

12/2016 光顧

餐廳在西貢開業多年，但都無緣一試，今日終於可試就腳的尖沙咀店。餐廳裝修帶有田園風味，環境幾舒服，好適合飲杯嘢，談天說地。但可能我唔好彩，今日點的egg benedict 同咖啡都非常麻麻，呢間只得個樣的餐廳，真係唔試唔知唔好食。但見幾多人幫襯，仲有留位，應該係我的個人問題吧？

12/2016光顧

12/2016 光顧

睇一個專講咖啡的facebook page提過呢間cafe，雖然無點讚，但印象幾深，因為呢間cafe，我認識左有趣的堡壘街(有興趣可睇番之前的post) 咖啡店感覺cozy，好街坊feel，個個都係熟客咁，就似鬼佬茶記，氣氛令我好放鬆，餐牌上有sandwich, pasta , all day breakfast 供應，笑容滿面的年輕人介紹我食個新出品  sandwich ，無所謂地叫佢幫我諗埋咖啡，不過只係個三文治都要$98，當然要坐番夠本，咖啡香濃，店內提供的雜誌小說都好啱睇，每個月來睇雜誌都抵。

(什菓千層餅，個皮有點濕，麻麻。hello 媽咪餅似奶油西餅，我無試)

11/2016 光顧

觀塘開左好多間咖啡室，要試都有排試，我會揀有口碑或睇相覺得有feel 的。呢間兩樣條件都齊，餐廳充滿日本feel，地方大，空間足，兼賣家具時裝雜貨。餐牌簡單，午餐算幾抵，$98沙律餐湯主菜齊，最抵係可以在menu上任選飲品一杯，要知道現今咖啡店一杯飲品連加一要四十幾五十銀。今次食的日式燒汁烤黑毛豬肉絲包，睇賣相應該叫三文治，豬肉絲鞋口，麻麻地，但環境搭夠，我來的時候唔多人，好舒服，等上菜時又可以睇下家品，雖然貨品一般，但成個package 係休閒舒適，會再來試多次其他食物。

( 花店有兩層，樓上全層係cafe，好多時唔開，用來做workshop)

9/2016 光顧

一直都提唔起興趣去muji cafe，因為灣仔銅鑼灣實在太多美食，Muji cafe 只淪為次選。因為香港首間Muji Book開左，當然要去八下，順便去cafe幫襯。自選套餐似food court 的三餸飯，頭盤、主菜、甜品，每樣幾款揀，的的式式，材料以蔬菜為主，配埋碗五穀飯，味噌湯，感覺健康，清清地幾好味。成舊水個餐，份量睇落唔多，但又估唔到幾飽肚。其實好多食物款式都可以自家製，不過人少買餸又煩，煮完又要洗，結果都係出街食。Muji books 的書本類型以休閒生活品味為主，配合埋店內擺設及貨品，真係令人心動，想打做一個Muji home 。最衰對於我來講位置吊腳，如果唔係我應該會係常客(打書釘果隻)

9/2016 光顧

9/2016 光顧

咖啡弄落户香港後都未幫襯過，因為唔想排隊。在台灣食過，食物唔錯，但最令我有印象的係充滿活力，笑容可掬的員工。反觀來到香港，員工笑容欠奉，如遊雲般在餐廳徘徊，裝修無特別，座落於舊樓中，一路坐一路地感到地板有點搖。我只係點左兩杯飲品加個咖喱牛腩，可幸食物品質同台灣一樣不錯。不過而家香港咖啡店遍地開花，好多質素都唔錯，未必要來呢間。

7/2016光顧

家下d cafe 真係愈來愈貴，份量同質量又不成正比，好似呢餐，班尼迪加咖啡連加一盛惠187 元正，班尼迪下面果塊係toast., 隻蛋仲大過塊包，個汁又唔得，乳化唔到成灘水咁，都唔鬼識整，咖啡普通，我覺得賣點係隻Fire King 杯多d，餐廳裝飾cozy精緻，天井後園襯埋棵古樹，幾有味道，若果對食物要求唔高就來當食環境，但價錢實在唔值。有時諗，想蒲咖啡店，儲儲埋埋d錢過台灣好過，平靚正。

5/2016 光顧 

宣傳話餐廳取經日本，pancake 又鬆又軟。食完後覺得仲有好一段距離，份量細，空氣感不足，tiramisu pancake仲有點實，咖啡淡，呢餐並不可取，好在唔使排隊。想食好味pancake，唔通都係要去台灣日本？

4/2016光顧 

咖啡專門店。咖啡為本，食為副，我間中會來食早餐。All day breakfast 凍肉煎到油淋淋，幸好牛角包熱辣辣又鬆軟，隻蛋都OK ，咖啡好飲，所以第二次點炒蛋牛角飽餐就算，平d又好食d，四十蚊，喺呢度飲杯咖啡都要。

3/2016 Oslo cafe@九龍城

咖啡店一間，幾舒服，小食意粉味道一般，食完唔會記得味道果種。餐牌亮點係個甜品toast box，浮誇朋友點個最浮誇的macaron toast box，成個生日蛋糕咁捧過來，色彩繽紛，幾開心。不過我一向對太多人造色素的食物有保留，只係食左少少，又估唔到個迷理macaroon唔係太甜，一個適合影相多過食的甜品。

3/2016光顧 T club@觀塘

睇雜誌介紹，以為又係普通咖啡店，揭過就算，點知見到句'coffee by Preigo，咁就要試下，因為我喜歡Preigo的咖啡。通常去鰂魚涌店(尖沙咀都有分店)，而家觀塘開左，唔使過海。餐廳設在辦公大樓內，一出𨋢靜英英唔見門口，以為自己去錯地方，想原𨋢落番去，要企定再check 清楚確定位置，原來轉個彎至睇到餐廳。室內設計清雅舒適，一列向海大窗。單位係多用途營運，有咖啡店、售賣健康食品、旅行社，另外又係教聯寫字樓。咖啡店咖啡水準如一的好味，食物我只試左個蜂蜜芥末烤雞沙律，雞扒健康無雞皮，烤得頗香，dressing 甜甜地，味道OK。不過價錢好似稍微比鰂魚涌貴？

2/2016 光顧

我係會自己一個人食飯的人，選餐廳已有一定模式，所以有時由朋友選餐廳反而有新思維。呢間 coffee shop 經過左好幾次，但我完全無考慮過入去，因為我唔喜歡燈光昏暗的咖啡店。當日叫朋友在希雲街任選一間飲咖啡，好死唔死佢選呢間，叫人揀完無理由又band 人，唯有硬住頭皮入去。入到去一張長枱common table , 另有梳化坐，再加幾個窗口坐，細細間，我坐梳化，尚算舒適。咖啡味道不錯，奶夠滑，加上立體拉花或公仔圖案，算係有驚喜。點咖啡時可以要求不同花款，呃like 之選。French toast 硬左少少，味道ok。見好多人都點左意粉，賣相不俗，或者有機會再來時可以試下。

2/2016 光顧

特別到此日式洋食店食egg benedict班尼迪，日式班尼迪同傳統西方的有咩分別？就係一貫日式做法 ： 保留外型但骨子裡完全注入日本元素，改變後又唔覺突兀。呢個變種班尼迪都唔錯，唔好同傳統的比較，當一個新的菜式就好了。

2/2016 光顧

咖啡店在西貢近居屋一邊的海傍街，相對較清靜。好舒服的街坊咖啡店。咖啡不特別出色，食物又唔係特別美味，但唔知點解幾鍾意的小店。可能因為有French toast?

1/2016 光顧

作為一間咖啡館，佢唔算突出，但作為一間開在紅磡的咖啡館就頗特出。店子外觀似精品店，小確幸裝修，播的歌又啱聽，在寒冷的早上坐喺入面嘆住咖啡，感覺幸福。價錢係中環價錢，咖啡不俗但食物普通。