Foodie 生活雜誌

5/2021光顧

主理九洲料理的居酒屋，出名食牛腸鍋，餐牌選擇多，多款佐酒小菜，下酒一流，鍋物、串燒、刺身.....乜都有，食物感覺地道，味道好，真係好似去左日本的居酒屋，當晚點左多款小食飲酒，最後以牛腸鍋作結，幾個好朋友好耐無見，食得開心飲得暢快，美好人生少不了好朋友💕

5/2021 光顧

經過見到呢間店，個名同門面都幾吸引，原來係台灣小食店，入去試下碗牛肉牛筋麵。碗麵賣相吸引，湯底味道唔錯，但可以再濃點，牛𦟌軟腍唔平均，部分柔軟，部分有點乾鞋，牛筋夠腍，但兩者都唔夠入味，若要喺同區食牛肉麵，我會去另一間。不過餐廳仲提供多款台灣小食，如蛋餅、大腸麵線、滷肉飯等，我見隔離枱的蛋餅賣相不俗，下次有機會再試下。

5/2021光顧

5/2021光顧

香港鮨店多如繁星，質素參次，雖然食開一間，但有時又會試下其他，通常睇下食評睇下相，合眼緣就去，今次試呢間。由香港人師傅主理，食材質素不俗，看似簡單，無話煙燻火灸，但又處理得有心機，穩陣的一餐，可以再試，睇下可唔可以做日常店。

4/2021 光顧

近年呢間好湯好麵大熱，主打真材實料湯底，過百蚊一碗麵都大排長龍，香港人真有錢。睇餐牌見餐廳選用高級食材 ： 西班牙火腿、北海道帶子、澳洲和牛，走精品小店路線。點左兩款湯麵，湯底同麵條確實唔錯，今時今日樣樣貴，若用真材實料熬個湯底確實唔平，但湯麵配料味道一般，唔覺得突出。配料追唔上湯底，唔夠和諧，係幾好食，但又未至於突出到要再來，試過就算。

近來無去行山，一來遠，二來唔敢一個人行，但若約人行，要就來就去又煩，諗諗吓，喺市區搵地方散步算了，整番個#陳食食市區散步系列先。頭炮係由荃灣行入汀九(頭炮，講到好勁咁，希望會有第二炮)，由荃灣海濱公園出發，沿住海邊行，而家海濱開左單車徑，又有隻癲噹公仔做裝飾，整條路佈置得幾靚㗎，單車徑只去到麗城，之後就要行馬路旁的行人路，可能另一邊係海，感覺廣濶，都行得幾舒服，行到汀九坐車出番荃灣食嘢，全程個零鐘，啱我。不過我係上個月行的，而家咁熱，我都係入番沾房涼住冷氣行跑步機好了。

4/2021光顧

嚟呢間餐廳真係三顧草蘆，之前兩次來，一係未開一係收工。呢次終於食得到，店內老闆及幾位老伙記團隊勤快合拍，店子小小，清潔整齊，食客大部分係區內客，外賣堂食點菜自動波，諗都唔使諗，反而我喺雞火煨麵同雲吞中間猶疑左好耐，最後大叔幫我揀，因為雲吞賣哂。不過小店預貨似乎預得唔多，我幾次星期日去，水餃雲吞一早無哂，係一次十二點左右至食得到。上次兩點零去到，連豆漿可樂都賣晒，真誇張。

4/2021 光顧

又一間年輕人的夢。餐廳提供一般西餐簡單餐點，即係意粉、all day breakfast 咁，出品一般，勝在環境清幽，餐廳開喺饒宗頣文化館內，人流較少，假日都好d，平日真係好靜，唔知會唔會成也選址，敗也選址？現今市道請人艱難，好在年輕人有個好爸爸幫手，聽好爸爸對請人問題呻到樹葉落，再努力同朋友度更表，就知道有理想都要有好多支持至成事。

4/2021 光顧

4/2021 光顧