Foodie 生活雜誌

1/2022光顧

平日駕車入大尾篤，無咁多人，但亦有好多食店無開。原本想食的店原來只供外賣，帶住太后無謂四圍走，臨時揾到呢間。見到個大路餐牌都都無乜期望，點知味道及質量又唔錯喎，而且下午茶餐食價比高，當日又無乜人，坐得好舒服。

1/2022光顧

太后的朋友話好食，叫我帶佢去，咁梗係要遵旨。餐廳喺美利酒店旁，似搭出來的玻璃屋，幾趣緻。一坐低知道係某集團𣄃下的餐廳已無期望，結果質素真係麻麻。我知道去酒店附屬的餐廳價錢係貴，因為包埋環境及服務，但呢餐真係物非所值，我點左幾款點心，見唔對路都唔再點，止蝕離場，一向埋單唔手軟的朋友都呻左兩句。可能八字不合，以後要會小心點，避免再幫襯呢間集團旗下的餐廳。

1/2022光顧

1/2022

noc係我欣賞的咖啡店，幫襯多年，如今遍地開花，分店開到將軍澳都有。剛開業時好墟撼，如今熱情冷卻，直入就有位。cafe 風格跟其他分店相同，一室白與灰，一貫簡約，空間大，落地玻璃自然光透入，好舒服。cafe 加餐廳，有多款食物提供，食材好，咖啡香，係區內cafe的好選擇。

1/2022 光顧

近排喜歡食串燒，試左好幾間，呢間感覺最良好。從訂位開始已覺得服務好，侍應有禮貌，主動為我安排吧枱角位，方便傾偈。裝修企理，窗明几淨，抽風系統好，無燒烤店的強油煙感。食材質素及味道均不俗，燒物火喉控制得好，串燒選擇多，雖然收得早(9點半左右），但無話分兩輪，價錢合理，飲飽食醉都唔肉赤，食得舒暢。

12/2021 光顧

科學園有多個住宅樓盤，隨住住宅入伙，變得非常熱鬧，同之前靜悄悄的環境簡直係天淵之別，假日來到差點無位泊車。一大班人有大有細，求其有位坐得落就得，結果揀左呢間高級快餐。食物唔難食但絕對稱不上好食，大大份填飽肚的類型。不過勝左地方夠大，室外環境舒適，對住個吐露港景，淋浴在温暖的陽光下，食物都變得次要。

12/2021光顧

而家香港食飯愈來愈難訂位，朋友星期六晚話要星期日去中環飲茶，我打定輸數揾唔到位，點知比佢揾到呢間喺橫街內，裝修靚靚的中菜館。不過點心質素普通，蝦餃燒賣大大件，無點心感，食價比低，試過就算。

12/2021光顧

朋友睇面書時彈左餐廳廣告出來，咁啱朋友喜歡食青口就去食，所以咪話喺面書落廣告無用。睇餐牌見樣樣食物都好heavy咁，點知又幾好食喎，成餐食完充滿罪惡感。假日仲有kids menu，只要於餐牌內點一個main course，9歲以下的兒童就可以喺kids menu 免費任點一款菜式，幾抵食。

12/2021光顧

日本燒肉呢家嘢，間唔中就會想食，但食完後又覺得唔應該再食，因為年紀大，愈來愈承受唔到和牛的油脂，次次都食到飽飽滯滯。講番間餐廳，裝修簡潔，食材高質，價錢合理，燒肉由侍應主理，唔使自己動手，食得舒適。都係一般高級燒肉料理店的質素，但又無乜特色的燒肉店。

12/2021光顧

幾個細路話要食日本餐，我當然唔會同佢食Omakase，佢地無要求，於是睇下就近有乜食乜。橫街呢間餐廳有點橫丁feel，兩間店一間係居酒屋一間係丼飯屋，其實兩間相通。我地今次坐丼飯屋，店面好細。食物質素一般，價錢合理，普普通通的餐廳。丼飯造型可愛，細細碗，配料冧到一個小山咁，啱相機食，拉麵不俗。