Foodie 生活雜誌

1/2022光顧

太后的朋友話好食，叫我帶佢去，咁梗係要遵旨。餐廳喺美利酒店旁，似搭出來的玻璃屋，幾趣緻。一坐低知道係某集團𣄃下的餐廳已無期望，結果質素真係麻麻。我知道去酒店附屬的餐廳價錢係貴，因為包埋環境及服務，但呢餐真係物非所值，我點左幾款點心，見唔對路都唔再點，止蝕離場，一向埋單唔手軟的朋友都呻左兩句。可能八字不合，以後要會小心點，避免再幫襯呢間集團旗下的餐廳。

蘋果叉燒酥 質素普通，唔覺有蘋果

侍應介紹的咸水角，賣點係可愛造型，唔係味道，都算有自知之明

小籠包同旗下另一間餐廳的質素一樣，可能呢間餐廳賣粵菜，所以辣度減半，改個名，價錢貴一倍，簡直就係搬字過紙。連花心思改少少都懶，無言。

灌湯餃 湯底味精重

黃沙豬膶腸 腸粉皮薄，但豬潤切得好細粒，都食唔出係唔係黃沙潤

擔擔鴛鴦雞 太后朋友推薦，將雞肉壓成方塊，伴上四川辣汁，賣相精緻，不過雞無味，仲要食到雞骨，點菜的時候話個汁會帶辣，諗住幾惹味，點知食落無乜味，另一侍應話係「小朋友都食到的辣」，我只有苦笑擰擰頭。

相中上圖我喺影的時侯，太后問我剛剛未攞走個餐巾圈的時候幾靚，做乜唔影？我話個黑口黑面的侍應小姐九秒九就拆左，我影唔切。可憐餐廳唯一好少少的擺盤都唔比時間我欣賞。唯有走的時候影張吉枱補數。

餐廳喺酒店平台外的玻璃屋

裝修清雅，天窗透入日光，幾舒服

有花園位，晚上飲杯幾relax