金鶴拉麵@佐敦 @ Foodie 生活雜誌

8/2019光顧

見到開飯網上幾家分店的好壞評分比例係9比0.1，好厲害的一間店，當然要試下，結果原來係一間「致敬版」拉麵店。無論裝修、食材、湯底、擺盤、甚至連湯底的加工方法、拉麵師傅的制服，都同跑馬地及中環某拉麵店有9成相似，分別只在於價錢打八折及份量較多，但味道亦打左折，加上配料同原裝版一樣，不合我心意，試過就算。唔喜歡呢間拉麵店係我的個人問題，其實湯底係唔錯，喜歡雞白湯的朋友可以一試。

裝修高雅的店面

作為一碗拉麵，出菜速度真係好慢。我等左半個鐘至有得食，等到火都嚟，侍應解釋係沾麵做法較複雜.....我叫佢解釋點解複雜到要半個鐘，佢至急急腳去催師傅。我睇到廚房就知點解咁慢，因為根本無做到！只得兩個師傅，又要烤鰻魚又要炸餃子，最慘要同致敬版一樣 ：制服打哂呔，所以動作都要elephant d，人地有幾位師傅，優雅得來keep到速度，致敬版得兩位師傅，湯拉麵湯底出菜前又要打泡又要炸牛蒡絲，已經做唔切，點有時間搞碗要浸冰水的沾麵？

先來餃子，估唔到係炸的唔係煎的，皮硬，我唔鍾意。經過後欄見到係用某日版的冷藏餃子

食友點的極濃湯拉麵，呷一口湯，有雞味，對辦

燒鰻魚串，現場即燒，居然仲快過比佢早落單碗沾麵😡，鰻魚彈牙肥美，醬汁咸甜度剛好，不俗

千呼萬喚始出來的沾麵，拉麵彈牙，但黐住哂一餅餅，沾麵汁同拉麵湯的濃度一樣，做湯麵尚可以，做沾麵就唔得，所以毫不掛麵，仲要望住佢放入微波爐叮熱比我，打哂折。兩塊薄薄的慢煮叉燒，肉質軟滑，不過慢煮雞肉(相中溏心蛋後爆哂光的白色肉)就有點鞋，兩款都唔係我喜歡的食法。溏心蛋入味，蛋黃jelly，好味

沾麵湯內有雞肉碎及筍，但湯唔夠濃，唔掛麵。睇介紹話什麼中間變奏點，加熱碗湯，店員提都無提過，我亦懶得問。

download apps 成為會員立即有100分，朋友即場DL換支可樂，我死唔蝕底DL左，諗住日後再來可以換隻蛋，不過食完後唔想再幫襯，就點埋隻蛋，結果又係等極未嚟，一問之下，侍應話要跟單排，我瞪大眼望住佢，結果佢立即攞出來。食完後儲到4百幾分，計過可以換炸雞加可樂，C9心態作崇 : 究竟應唔應該再食?