Foodie 生活雜誌

金刀比羅宮係琴平必遊景點，但我之前來過兩次都居然無上去，第三次來到琴平，正所謂事不過三，相信我未必會再來，今次決定點都要上去參觀。將太后安頓好，比自己一個小時來回，免得太后等得太久。全程785級樓梯，來回千幾級，簡直要左我條老命，由於之前無睇過資料，行到中間至知有間靚靚cafe，梗係唔可以錯過，點都要嘆杯雪糕，最後要個半鐘至完成，總算達成目標，感謝太后又讓我任性一次。

參道兩旁係商店小街，就算唔上神宮都可以買手信

仲有茶屋及小食店

進入寺廟範圍，正式啟動行動mode

check point 1，大門

回望琴平市，感謝好天氣

跟住一段平路，可以稍為休息，樹蔭下兩旁石柱刻上捐獻者的芳名

又見石階

每見到一個鳥居就覺得距離終點又近左，好有鼓勵性

我無睇過資料，一心只去睇神宮，估唔到山上有cafe，行去八卦下

原來係化妝品牌資生堂旗下的cafe，好認真

下層係用餐區，較formal，要訂位

上層係cafe，輕鬆得多，一邊藍白磚牆，有藝術感，另一邊落地玻璃外係青蔥樹影，天然的藝術

點都要嘆！坐個靚位，食杯fancy 芭菲。

日本的消售方式無孔不入，洗手間都有display

再努力

到達旭社，見到個大宮，以為到左

我都知自己太天真，當然要繼續行

百度石，倒數一百級到本宮，亦係最斜的階梯

其實我已經喘哂氣，加上心急趕住落番去，想行快d，不過卻力不從心，但見到相中右手邊的年輕人腳軟坐低左，突然覺得自己唔算差，唔知點解即時動力強左，開turbo越過佢

到達本宮，一位香港遊客見我在自拍，好熱心地話幫我影相，結果.........我平時成日怪駕駛員影相差，原來佢都唔算影得差，所我即時send張相比駕駛員，再讚佢

Goal !

本宮全貌

往瞭望台睇景，唞一唞。其實仲可以再上奧社，但要行多差不多一倍的石級，我怕無命落番去，無想過行

本宮附近有加建新翼，工程在進行中

從火車站坐車上來，就會喺本宮的橫門落車，不過若要去奧社都要行。

乘車資料，從JR車站出發

大企業的捐獻品，掛滿整個天花

回程，往下行輕鬆得多

好多錢，好多個願望

連御手都有期間限定，今年係呢個充滿童稚感的「笑顏元氣」設計，其實應該買來做個記念，可惜我落山見到海報至醒起要買，但回頭太難，唯有嘆口氣繼續落山，當時有點點遺憾，回來清醒後就知道唔買係對的，因為好似要幾千yen。若我買都係一時衝動，而家慳番

返回地面，睇心跳率同時間就知上同落所用的體力同時間係差好遠

若唔想行又唔想坐車，可以坐轎，都係另類體驗，不過見到個價錢，我都係黯然決定用腳行。