Foodie 生活雜誌

原本第一日打算從岡山落機後直去高松，但長途跋涉，怕太后頂唔住，結果出發前一星期至改變計劃，先住岡山。旁晚到達火車站，酒店在車站旁，超方便，check in 後放低行李就去對面AEON Mall逛，商場勁大，行足一日都得，不過太后興趣不大，同佢行個圈後，晚餐安排左佢喜愛的燒牛脷，點知去錯左另一間，質素麻麻，太后好失望，飯後去商店街行下就回酒店。今晚的酒店有温泉，泡完舒舒服服地返房瞓。

從機場往市區只有兩個途徑 : 巴士或的士，車程約半小時，巴士760yen 一程，的士約5500yen。我班機機1550至到，查過時間表，機場接駁巴士要1755至有車，即係要喺機場等成個幾鐘，點知飛機早到，我趕得到架車。後來至知原來車係跟航班，當然若你太遲出閘，巴士係唔會等你。

岡山機塲細，一過海關出閘已有工作人員指示往巴士站，站前亦有職員指示如何購票，非常清晰，讚👍🏻

心想早知照原定計劃直去高松，不過上車後居然塞車，睇到太后喺車上瞓著左，我又暗暗慶幸自己改左行程。

放低行李往AEON mall 逛個圈，有我喜歡的Kapital同中川政七商店，正。

晚餐好失敗，原本只需去AEON MALL 6樓間牛脷店，點知搞錯去左車站西口另一間牛脷店，去到已知搞錯，但無可能要太后再行，唯有照食，質素麻麻，太后好失望

太后唔聽我講，點薄切牛脷，本身薄切已無質感，加上食材一般，燒得過火，太后牙力所限，咬唔開 (我無問題)

我點左厚切牛脷，但燒得較乾，唔夠juicy，套餐內的湯味精重，飯唔夠熱。