Foodie 生活雜誌

今日係移動日，因為車程長，食完早餐就出發。港傭今次純粹跟團，所有行程由太太計劃，港傭只提出幾個要求就無再參予，雖然太太貼心地於出發前比左行程資料我，但我無想過要帶腦，所以無睇。只知道今日車程好甘，景點只有粉紅湖。路上一直天陰陰，開車一小時左右到達粉紅湖，顧名思義，湖水呈粉紅色，陽光普照時更鮮豔，好靚好神奇。大家當然係瘋狂影相，上天眷顧，短短大半小時內，大風、大雨、天晴、天陰的粉紅湖景色都比我地睇哂，心滿意足下離開。之後就係漫長的車程，太太對於車程的報告係有點另類，話說大家坐到呆呆地時，太太突然殺出一句 :「仲有1Km就到！」大家立即醒神，好興奮的同駕駛中的先生加油，但加油期間我有點疑惑，只見四周荒涼，聽講今晚住的係渡假村，可以睇海豚，感嘆西澳真係一個神奇的地方，咁荒涼的地方居然可以有渡假村，地貌仲特別到咁近海都唔覺 （之後都覺得自己天真得可怕），眼見GPS的1KM快將行完，太太興奮地講：「終於行完呢條公路，下一條公路係100Km!」大家聽到都好驚嚇，不過都唔及揸車嗰個，我喺定驚後先送個「謀殺親夫」的牌匾比太太，再輕拍司機坐的先生膊頭，講句 ：「對你的遭遇深表同情」之後，決定瞓陣。過左一千年之後終於到達渡假村，天色已黑，匆匆check in 安頓好，食埋晚餐就瞓覺了。可憐的先生今日揸左六小時車。

一早出發，天清氣朗，油菜花田對我微笑

每天都要見的肥威 

第一站 : 粉紅湖，粉紅色的湖水確係美，配上藍天白雲，靚到似假。可惜太大風，又落雨，只可以在lookouts 的一帶參觀

晴天的pink lake，粉紅色的湖水好出，配上藍天白雲，令人心曠神怡。

陰天下的湖水失色不少

好大風，湖水都吹皺了，想像若天氣好，藍天白雲影照住平靜的粉紅湖面，一定更夢幻

又再上路，下雨的彩蛋係彩虹

​

兩隻電兔坐車坐到無哂表情

落車去厠所，遇見公厠旁的公園，放電時間

再上路，我真係有一剎那相信喺呢個環境下，仲有1Km 就到會渡假村

結果都要入黑至到。

去到渡假村，靚靚餐廳已無位，唯有買外賣。坐左一日長途車，三位小朋友好乖，全無扭計，但落車後不免想四圍行，不過天又黑，大人都攰，唯有喺等外賣時攞出電子奶咀，比佢地睇卡通片，得左

渡假村有兩間餐廳，一間要訂位，到達時已無位。另一間係酒吧，賣小食，不過都係無位，只好買外賣回屋食。我一向唔多喜歡食外賣，呢類香口食物凍左更加唔好食，相中食物其實不俗，少爺仔口味似乎同我一樣，食左一啖就向我求救 ：

少爺仔 ： 港傭，食物唔好食

我 ： 係呀，我都覺得麻麻地，不過今晚無嘢食，點都要食。好又一餐唔好又一餐，將就下，總之喺你碗內的就要食哂。

港傭都有港傭的宗旨，小朋友係唔可以揀飲擇食，唔係話唔鐘意就可以唔食。