呢間餐廳，由佢開喺舊葡京的時候已經想食，可惜得個諗字，至今搬左去新葡京，夾好哂天時地利人和，終於食得成。食之前無乜點睇介紹，總之見到個價錢負擔得起就算，結果無令我失望，環境好，服務好，可能係午餐關係，加上經過強國人的洗禮，就算係fine dining 的都唔太拘謹 (我見到隔離枱的大款食到最後起身伸展筋骨)三小時的豐富午餐色香味俱全，非常滿意，可惜過澳門皮費太重，否則好有興趣再光顧。
記得先訂位，可以經網上預訂，餐廳要求以信用卡登記。
餐廳在酒店39樓。
進入餐廳範圍，氣氛跟樓下的土豪金截然不同。行過通道再坐專用𨋢上43樓餐廳。
打開門，進入餐廳用餐區，影入眼簾就係古董木製鋼琴。
水晶吊燈從塔頂垂吊下來，高貴典雅，覺得自己幻化成金絲雀走入高貴雀籠。
餐廳呈環形，可以行一圈，一邊面向澳門塔，好開陽
另一邊向市內景，地方較侷促，訂位時不妨指定景觀。
作為一間高級餐廳，當然會使用高級餐具，頂級Christofle餐具唔少得，我好欣賞隻水晶杯。
午市有三個set，$688，$788，$888，自選頭盤、主菜、甜品，價錢跟菜色多少成正比，另外可以配酒。我遠道而來，盼望多年，當然選個最多菜色的$888，有Amuse-bouche，apptizer, soup, 兩個main course ，dessert。至於配酒就無財力了。
侍應先推出麵包車，上面放滿不同種類的麵包，侍應遂一介紹，之後先來籃綜合麵包，之後可以選擇喜歡的再添加。
樣樣都好食，不過我無能力食哂，若喺香港，我一定會打包。之前喺香港店食，侍應幫我打包，第二日打開個盒仍然香氣撲鼻，係我食過最好的外賣，好難忘。
牛油出場都好架勢，分有鹽無鹽，由侍應在牛油山上批出，再捲成牛油捲，成件事貴哂
Amuse-bouche 阿拉斯加皇帝蟹肉伴馬鈴薯凍湯及薑味啫喱凍 蟹肉甜，湯滑，但唔覺有薑味，配上帶點辣的脆片，層加味道層次
頭盤 法式牛仔鵝肝凍批伴野菌沙律 牛仔肉與鵝肝混合而成的凍批，味道濃烈有質感，凍食可以減少油膩感。野菌沙律亦吸引，不同處理方法的時令野菌好香甜，加上新鮮蔬菜及帶點酸的醬汁，好清新
頭盤 紅菜頭沙律伴蘋果及牛油果、香草及青芥末雪芭。朋友點，顏色鮮豔討好，試左少少雪芭，非常清新的味道。朋友都好滿意
法國青露笋濃湯伴幼滑洋蔥忌廉 幼滑的幼滑洋蔥忌廉 墊底，上面放上生氣勃勃的鮮露笋，整個設計有如精緻的小擺設，好靚。加入幼滑的露笋濃測，青露笋肉嫩清甜，配上同樣鮮甜的洋蔥忌廉，整個湯充滿蔬菜的鮮甜，完全係食材的新鮮美味
主菜 龍蝦意粉 龍蝦爽甜係意料中事，意粉有咬口，海鮮汁充滿濃濃的龍蝦味，味道好豐厚，海鮮味充滿口腔。不過朋友嫌品道稍咸
生牛肉韃靼伴黑松露及薯條 好少遇到呢個菜，就算遇到亦未必敢點，因為食材稍欠新鮮都死。不過今次我好放心，當然唔會錯過。生牛肉肉質柔軟牛味濃郁，調味恰到好處，唔會蓋過牛肉的鮮味，再纖開用金箔包住的鵪鶉蛋伴食，蛋香黏住牛肉，味道更濃，其實食到呢度已經七成飽，所以無能力完成好精緻的炸薯條及蒜香多士。
講起steak tartar 記得N年前喺尖東某餐廳係由侍應推架車地餐枱前，加調味即席炮製，調味後用個小羹比少少個客人試味，直到客人滿意至上枱，但今時今日已經好少見到。
主菜 black cod 朋友點的主菜。肉質非常豐腴的鱈魚，但又唔會有好油的感覺
主菜 香草羊鞍伴特色茄子 朋友點。試左一舊。非常柔軟的肉質，似食左隻綿羊落肚，我直頭想自己再點一碟
可以選芝士及甜品，其實想試下芝士碟，但一來太飽，二來實在抵受唔住甜品車的誘惑 ，結果都係選左甜品。可以在甜品車上任選兩款甜品，可能其他客人已走得七七八八，我地係最後一枱，所以侍應姐姐任我地選，
最後我選左puff 同 opera 。puff 外皮帶點煙靭，內裡的朱古力奶油好幼滑，opera 充滿朱古力濃香，兩者都好好味。
之後仲有雪糕同雪芭選擇，用銀筒盛載，好高貴
熱情果雪芭，酸酸的消下滯
朋友選的開心菓雪糕 太甜
最後係咖啡及糖果 又一架糖果車，真係充滿歡樂。糖果造型精緻，就算勁飽都唔捨得唔選。若食唔落，侍應亦提出可以為你包裝攞走，當然只限個別糖果，某些糖果係包唔到。
我的選擇
留言列表
香港食食食 (25)
