Foodie 生活雜誌

10/2017光顧

素聞WHISK 的午市套餐抵食又好食，終於安排一次同太后來食。餐廳裝修可能因為用色關係，有點殘舊，而且枱與枱之間距離近，我坐近通道，成日被侍應碰到張櫈，感覺麻麻。除此以外，問題不大。set lunch餐牌內starter，main course 同dessert 各有幾款菜色選擇，可以揀2 courses、3 course、4 course套餐，部份菜色要另外加錢。套餐包果汁或餐前酒，咖啡或茶，頭盤精緻，main course 大大份，味道好，指定信用咭仲有85折，真係幾抵食。

好智障地，我打去WHISK訂位，侍應講左我個名出來，我問佢點解會知我個名，咁神奇！侍應笑左，話因爲我喺美麗華book 過位，所以有record，我真係超娘😂😂😂

餐前飲品，太后點石榴汁，我點白酒。白酒幾甜，似果汁

麵包好味，其中的蘑菇包好香。香草牛油自家製，用個貝殼裝住，好骨子

鮮法國雞油菌田螺 頭盤，擺碟精緻。入秋又到食菌時，好多餐廳都用雞油菌，味道濃郁，田螺肉厚，配上芫茜汁同香茅泡泡，配搭有新鮮感味道好

蟹肉龍蝦凍 頭盤，一見到龍蝦兩個字就預左要加錢。果凍用一個精緻玻璃器皿裝住上枱，成個精品咁。蟹肉同龍蝦拆肉，加上高湯做成果凍，上面鋪上牛油果忌廉汁，以魚子及小露筍做裝飾，食得又睇得，好滿意。

相機失靈，頭盤居然影唔到，只係影到呢張。近鏡的係維也納炸小牛排，好耐無食過，結果發現我真係對炸物麻麻，呢件炸得較油，份量又大，好滯。反而太后點的燒乳豬好香，皮香肉質鬆化，配上清甜的羅馬生菜，不俗

因為太飽，無點甜品。最後的咖啡配Madeleines小點心，呢個小點心我一向興趣不大，加上佢零落地掛喺個盤栽上，造型麻麻。咖啡普通。

餐廳裝修可能因為用色關係，有點殘舊