Foodie 生活雜誌

7/2017光顧

太后貪慕虛榮，見到環境靚的食店都想一試，今次的餐廳，會唔會係香港食點心的最高點？餐廳設喺102樓，主要係食個氣勢食個view ，嚟得就預左貴。點心用貴價材料，海班肉燒賣、鵝肝鮑魚糯米飯之類，味道頗濃，水準一般，食完都無印象。不過我非常欣賞餐廳的服務，從待應到經理再到厠所呀姐，個個笑容滿面，服務殷勤細心，絶對令我如沐春風，賓至如歸，最重要係太后食得開心。

今日的點心全部係依太后喜好，習慣我要將餐牌稟告一次，再由太后欽點。是日太后點左 : 

珊瑚蚌腸粉  腸粉唔夠薄，珊瑚蚌爽口，唔錯。

蝦多士 多士香脆，蝦膠鮮甜，口感豐富，好味！原本8件，侍應主動為我轉4件，夠靈活，讚！

臣兒為太后點左佢最喜歡的鵝肝鮑魚糯米飯，因為睇死佢覺得貴唔會點。一人份，應該三啖食哂，但侍應主動提出分兩份，我都忍唔問 : 咁高難度都得？侍應禮貌的話無問題。結果每人啖半，幾香，不過醬汁濃，有點咸

杏汁流沙包 杏汁味好假，似漿糊，唔好食

海班蝦餃 饀料漲卜卜，但味道削d，都係喜歡傳統用豬肉

透明個餃唔記得係咩

另外送左個小點心 我影相時侍應主動過來提點我枱上擺位構圖，非常窩心

由上一層影落去

樓底高，加上居高臨下，好有氣勢

等左成個月至有呢張窗邊枱

當日天氣好，但坐窗邊都幾熱

望九龍景色，無咁靚

離開時侍應話帶我去參觀天空之橋(咁上下名)，話好多人喺度影婚紗相，以為係透明睇到風景，點知原來係兩邊放滿水晶的長廊，其實兩邊係貴賓房，金光燦爛徐小鳳feel，有點失望，但侍應主動話要幫我地影相，我同太后又玩一餐