Foodie 生活雜誌

喺旅館舒舒服服嘆完個早餐先出發。先去坐小火車，若果唔係有少爺仔我相信我係絕對唔會有呢個念頭，因為睇介紹，呢d只係無聊荔園玩意。點知我錯了，居然覺得幾好玩！(我係咪有問題？)觀光小火車好簡單，有兩卡，可坐18人，無遮無掩，在已停用的高千穗火車站出發，經過民居，穿過山洞，去到高千穗峽，亦即係鐵路的盡頭，因為前路已封閉，小火車會往回走，全程約半小時。坐小火車同揸車唔同，有穿過山嶺的感覺，更接近大自然。營運機構又會搞下花臣，在山洞內放幻彩射燈，到左鐵路盡頭又會放番皂泡泡，雖然有點小學雞feel，但我又幾欣賞個心思，為平淡的鐵路旅程加添趣味，最重要係少爺仔都好開心。不過天氣勁熱，差點中暑，但天氣唔好亦唔開，呢個唔係重點節目，若果悠悠閒閒遊高千穗又遇啱天氣好的話，都可以來玩下。

已經停用的車站

先購票，每隔40分鐘一班車

乘坐的觀光小火車，無遮無掩，雨天淋好天哂

沿途景色

山洞內的彩燈，你咪話，無想過咁fancy，都幾驚喜㗎

至高千穗峽，鐵路盡頭

腳底下就係深淵

另一fancy 小把戲，bubble bubble

跟住遊天岩户神社同天安河原，亦係整個旅程中我最喜愛的景點。我係膚淺觀光客，無睇歷史背景，純粹參觀，之後至知大概係天神聚集的地方，加點神話，有興趣就自己google下啦。天岩户神社古樸清幽，神社佔地不大，可能因為交通不便，遊人唔多，(同高千穗峽無得比)，穿過鳥居後只見四圍都係參天巨木，神廟透著淡淡檜木香，令我有心境平和的感覺。穿過神社沿馬路再往前行就會見到天安河原入口。之所以嚟呢度係被旅遊書的相片吸引，一個在岩洞內的神社，好原始的感覺。沿路往山內行，家樂徑般簡單易行，被層層深深淺淺的綠引路，陽光在樹梢照入，愈行得入愈原始，似隨時有精靈走出來。行二十多分鐘就見到一個大岩洞，內裡有鳥居及天安河原居，周圍都係叠起的許願石頭，好有意境，時光彷彿停頓了。行番出去小cafe 食杯雪糕就離開去下一個目的地 : 大分。

天岩神社

簡樸清靜遊人較少

參天古木

神社透著檜木香氣

穿過神社往前行就見到天安河原入口

捉精靈的遊人

層層疊疊的綠

終於見到了！

洞內神社

洞內外望

叠石祈福

鄉下地方的洋化cafe

在峽谷旁的觀景露台雅座

行程小插曲 : 

話說離開高千穗往別府，plan行程時一直都話兩個鐘車程，點知車上的GPS 話我知要4個鐘！照咁計去到大分晚餐都食唔到！嚇到我！再開google map都話兩個鐘，決定跟G 神搏一搏，比較之下，GPS帶我行大路，G神帶我地行山路，沿途只遇到一兩架車，最大煲係手機訊號成日斷，仲要最愛在分叉路先斷，唯有回歸基本 ：睇地圖。沿路都唔敢停，心內一路擔心路段會否因為地震後封路，但當然唔敢講出口。午餐都無食，不過靠奶奶買來放在車內的食水都可以捱一星期，唔擔心。中途內急，見到一間鄉下小店，前鋪後居，貌似關門，但頂唔住要借厠所，佢居然比我去用佢屋企個厠所，真係千多萬謝，結果當然係有驚無險到酒店。今晚在靚靚酒店嘆温泉，爽YY。

兩個GPS分別，行行下變左差45分鐘

沿路車同人都唔多見

 終於見家鄉

 嘆下先