Foodie 生活雜誌

9/2015 光顧

朋友介紹 : 「容易book位，過時過節都無問題，只要你唔介意價錢貴少少。」星期四近中秋，都唔多人，地方企理，酒店服務，六個人點六個菜，加兩支啤酒，白飯連茶錢加一，送埋糖水都只係$1200（唔知點解有85折），食物味道不俗，菜式有心思，不過造型就似小菜王，朋友話叉燒好好味，但唔知我會唔會再來了。

花雕雞  雞瘦，骨多過肉，但個汁好好味，用來撈飯最啱

金枝玉葉  係小食拼盆 ： 黑醋木耳、百花釀大葉、咸蛋黃炒四季豆。講到攞獎咁勁，梗係要試下，但落單時侍應好似唔想我點咁，係咁話要好耐，不如試其他。結果上桌後都唔明點解要整咁耐，可能百花釀大葉功夫較多？味道又唔見得特別好。

炒貴花翅，幾乾身，味道唔錯

忘記菜名 釀牛肉加黑椒汁，幾特別，但味道麻麻。牛肉同魚肉唔多夾，黑椒汁又咸，怪怪地

銀芽小炒皇  呢碟菜個賣相就算在海港都覺得唔合格，何況酒店？不過可能簡單就是美，味菜，銀牙加冬菇絲，甜甜酸酸，伴飯唔錯。

帝王骨，舊肉望落去似幾肥美，其實內𥚃乾爭爭，唔好食