大偽術家
藝術呢家嘢,我真係連條鐵都唔識。電影係真人真事紀錄片,主角係史上藝術界最大騙案的主角,一個騙子。以畫假畫維生,騙過所有拍賣行專家及收藏家,以高價售出畫作,一家過著奢華生活。主角在拍攝時已被補,在片中如警訊一樣案件重演,示範如何「創作」假畫。最令人眼界大開的係主角可以模仿各大師的畫風,更神奇的係佢唔係臨摹,而係代入大師的想法再「創作」出一幅畫出來!仲勁的係可以「造」出一幅1920年的作品,無論畫布,質感都做到足,根本就係天才!睇完後感覺好諷刺,何謂藝術?一幅畫,當鑑定出係名家作品時就可以價值連城,但若畫家係名不經傳時便立即一文不值。究竟現今所謂藝術的意義係作品本身還是作品被市場捧出來的價值?最有趣的係主角話自己在過去三十年已經「創作」左300幅作品,但被發現的只係少部份,好些畫作仍掛於著名藝術館內,但佢無透露係邊幅,真絕!此電影題材特別,帶我認識另一個世界,只係睇主角畫畫都已經津津有味了。


全站熱搜

Hearoom 發表在 痞客邦 留言(0) 人氣()