Foodie 生活雜誌

7/2017光顧

間中有朋友會問我攞行程，雖然年代久遠，但有時路線景點都係差不多，可以參考下。我會陸續整理後出post，不過住宿及餐廳請自行再確認。

7/2017 光顧

興之所至入西貢行下(我最喜愛去湯記出口店)，記起有foodie友推介過某間雞飯好食，點知又揾唔番個留言，只記得係喺巷內，唯有憑感覺。巷頭呢期出名的店雖然無人排隊，但一向唔喜歡湊熱鬧，無去。既然我咁有型，當然就立即中伏啦。見呢間有三個鋪位，全部泰國人員工，又間間都有人坐，應該可以。一座低又突然無信心，改點鴨肉河，再「推薦」友人點雞飯，結果全軍覆沒，浪費左一餐，應該係食神懲罰我無記性同懶有型😝😝

7/2017光顧

7/2017光顧

7/2017光顧

餐廳分鐵板燒同壽司吧，我通常來食壽司，鐵板燒係第一次。三大人一小孩光顧，點一個二人餐，一個一人餐，餐廳好好服務，送小朋友沙律、蒸蛋同甜品，食物都盡量幫我地分4份，我有叫過師傅唔好分，怕佢麻煩，其實係自己已經點得少，仲要分4份，都唔知食到咩，但師傅好客氣，話希望我地大家都可以試下各款食物，結果好似5餅2魚咁，成功分配。師傅功力應該唔錯 (我唔識)，所有食物都生熟剛好，有柔軟度，係個炒飯咸左d，最重要係食得飽，要知道鐵板燒係一個搞好耐最後得細細舊食的菜系，今次重要四人食三份，以鐵板燒來計，價錢算親民，食材新鮮，算係咁。

6/2017光顧

來飲茶時見晚市小菜選擇多，又幾有心思，柚皮鴨掌呢類舊式小菜都有，所以又試下，食材認真，味道唔錯，以小菜嚟計價錢稍高。

6/2017 光顧

甚少食韓國菜，若果要食都係食果幾間傳統店，新式的oppa店恕我年紀大，唔識欣賞。多年來都食新羅寶，但上一次食到火鬼滾，將d食物燒到乾爭爭，侍應態度散漫，愛理不理，所以好一排無幫襯。最近朋友話要食，又順佢意。點知今次又出奇地好，唔知以為係分別去左兩間店，水準咁唔穩定的餐廳，我唔會揀，陪朋友就例外。

6/2017 光顧

店子小小，只有約二十個坐位，喺砵蘭街來講地方算清雅骨子。 牛柳河湯底味精頗重，食緊已有脷麻的感覺，扎肉雞絲湯粉較清淡，老闆介紹的燒肉紙卷無特色，試過就算。

6/2017光顧

餐廳對區外客來講算偏僻，出名係越南河，即係越南牛河。街坊小店，一般魚旦粉店格局，無想過會有越南河，而且仲係招牌菜。越南河賣相討好，牛肉晤鞋口、河粉滑，湯頭香濃，仲要賣$35，確實係唔錯，可惜食完極口渴，我就唔啱了。朋友點左雞飯，普通，相都無影。