Foodie 生活雜誌

離開藏王雪山，去山形食米沢牛做午餐，中途加插左一個特別節目(有興趣請睇掛衫張相的描述)，結果落到仙台已經旁晚，行左一陣商店街又食晚餐，今晚又係食牛，雖然係我好喜歡的牛脷，但午餐的和牛實在太膩，差點食唔落。

午餐喺登起波食米沢牛，餐廳喺酒店地下，地方舒適，牛肉質素好好👍🏻

店面舒適，以卡座為主

生牛肉，調味太重手，好勁麻油味

我點燒牛肉，但食幾件已好滯，又一次証實我似乎要同和牛講bye bye

朋友的shabu shabu

朋友的steak

特別節目來了。去日本餐廳，店家通常會為客人掛起外套，習以為常，但今次居然發生小意外，離開時發現外套不見了😱話說呢間店的掛衣架放近收銀處，基本上個個客都掛喺度，點知離開時團長揾唔番件褸，只留下一件同佢件褸一樣顏色及款式差不多的褸。但團長件褸的gore tex，佢呢件係uniqlo。問店員，佢話唔清楚，佢只負責掛褸，並無保管的責任。大家無辦法，記起我地鄰桌有位男士同團長身型差不多，可能佢攞錯。於是團長要求睇CCTV，店員話要等一個鐘，咁我地橫掂無嘢做，又等下，因為外面實在太凍，希望等的時間當事人會攞番件衫回來，最主要係想報失備案claim保險。點知過左一陣經理問我地若賠錢有無問題，咁當然無問題，反正我都係claim保險。搞左一輪收完錢，店長話開店10年未發生過呢個事件，因為我地係遊客，唔希望我地留下不愉快經歷，今次係破例賠錢，平時係唔會負責，好多謝佢呢個安排。團長喺無外套的寒冬下嗱嗱臨回仙台買過件外套。好彩無冷親，另一個好彩係團長無將銀包証件或車匙放喺褸袋，否則就大煲。經過今次事件，以後件褸都係跟身好了。

晚上食牛脷，呢間我喺幾年前去過，今次再來，味道不變。今次終於食到我想食的番茄了❤️