今次去日本想舒服d,決定試下包車遊。特別鳴謝團友A認識的淘寶達人幫手。淘寶網尤如黑洞,淘乜都有無盡頭,我成日話要淘個男人,今次終於成功,總共淘左三個男人……司機。
今次我幫襯呢間係「南京自由自在旅游专营店」無人介紹,全靠達人睇評價,大家膽粗粗決定。訂車過程同一般淘寶買嘢一樣,揾啱產品拍落去比錢就係。
我哋一共訂左三程,包括一程機塲來回,兩程全日包車十小時。落單前先於對話中溝通好,寫明日期、時間、坐車人數、接送地點,選擇車款,客服會報價,所有資料確定後付款,48小時前取消可退款。
落單以後,喺出發前一日,旅遊公司會同司機及客人喺微訊開一個chat group 溝通,我地最後確認資料後,第二日就出發。
先講來回機塲,四人乘座,車款為Alphard,由機塲至銀座酒店來回1700人民幣。來回司機均為中國藉男子。到達日本機場開電話已收到司機聯絡,出關後就可以上車,全程好暢順。
至於由東京去箱根分兩日包車,每次十小時,每日2500人民幣,已包所有高速及油費,無額外費用。若臨時更改地點就要同司機溝通,調整費用,好似我有一日突然改行程落伊豆,因為路程遠左,要比多一萬yen。視乎情況跟司機協商。呢一程,原本都係訂Alphard或同等級,結果只來左odyssey ,雖然都係七人車,但就細架左。司機殷勤,到目的地放低我哋自己再去泊車,差不多時間比微訊佢來接,方便舒適過自駕。
包車公司的操作就如uber,平台放張單出來,由不同司機接單,箱根一程的司機住神奈川,所以就接了,問過司機,若私下揾佢包車的價錢只比平台平幾百蚊,但就無保障,有事的話投訴無門,所以都係去番平台好d。
今次的體驗感覺良好,每程都係上車落車,唔使搬行李,喺箱根包車的兩日想去邊就去邊,司機好落力,同我地四圍揾嘢食,隨傳隨到一樣,最重要係可以溝通。消費一定比坐公共交通工具貴,但年紀大了,唔想太辛苦,用錢買享受。今次消費四人攤分,唔算太貴。不過各人價值觀不一樣,「坐定唔坐?捨得比至好坐😆😆」
以上資料希望對大家有幫助,附圖係公司網站的圖片,若有興趣,去淘寶輸入「南京自由自在旅游专营店」就揾到。