Foodie 生活雜誌

8/2021 光顧

餐廳做割烹套餐，午餐同晚餐menu一樣，分兩款餐，tasting menu 及Omakase Menu，今次我試午餐Tasting menu。食材高質烹調用心，雖然未至於驚艷，但感到滿意，價錢唔平仍物有所值，有機會再來試另一個餐。師傅會喺食客面前烹調食物，一路睇住都幾有趣，日本師傅同兩個助手都幾靚仔😁，侍應詳細講解食物及餐具的資料，令我長知識，態度友善又唔覺煩，一個好侍應對一間餐廳真係好有影響。

前菜 毛蟹粟米茶碗蒸 。茶碗蒸凍食，蟹肉份量多，加埋甜甜的粟米及粟米汁，似食布甸。

炸物 蕯摩牛腰脊 牛肉面頭撲粉炸，之後切片上，類似吉列牛肉，點山椒葉鹽及山葵食。肉嫩柔軟，但照舊無牛味。我唔多喜歡食鹿兒島牛，可能價錢親民，所以香港大多數餐廳的和牛都用呢款牛。(我居然無左切開後的相😱）

炸物 鱧魚天婦羅配枝豆真丈 鱧魚天婦羅外層脆漿極薄，連一條小骨都無，比起平常食的鱧魚滑，枝豆真丈，即係枝豆魚蛋卷，甜甜的，配蘿蔔茸汁，好味。

師傅喺上菜時在碗上噴水，好奇一問，原來古時日本天皇怕人在菜餚中下毒，所以在上菜前喺碗外層噴水，確保運送過程中食無被人下毒，因為噴水後隻碗有人掂過會有指紋，又長知識了。

冷麵 素麵用海膽汁包住，topping再加上海膽、魚子醬及紫蘇葉，幾樣配料溝埋一齊，湯汁變得更濃及掛麵，唔錯

刺身 : 鰈魚、鯛魚及鰆魚。

 刺身質素一般，特別在配刺身的豉油。刺身配煎油，原來古時候無豉油，會用清酒、昆布、木魚花及梅子煮成煎酒當豉油，為刺身提鮮。剩下的侍應示意我地可當酒飲埋，煎酒鮮中帶點咸味及梅子的酸味，UMAI ，另一款豉油食落比一般的豉油濃厚，原來係加豉油自行調味後再加入魚骨煮，加上香蔥，豉油好味過刺身。

壽司 金槍魚海苔卷 初初遠睇以為係肉丸，師傅會烘過塊紫菜再包手卷，保持紫菜香脆，金槍魚加入黃蘿蔔同蔥調味，肥美好味

肉 蕯魔和牛溶岩燒 牛肉薄燒配醃過的蛋黃。餐廳用富士山火山石做的鐵板來燒牛肉，侍應講解塊板係天然岩石，石上佈滿細小洞洞，煎牛時油會藏到洞內，唔會浸回牛肉中，令牛肉無咁油膩。牛肉配醃蛋黃，菇菌及出汁同食，好鍾意食醃過的蛋黃，蛋黃夾開後呈啫喱狀，味道濃郁。

 侍應提醒要留番少少汁撈之後的黑松露飯，無諗過個飯會咁矜貴，一心諗住係一碗飯，原來只係一匙羹仔飯，所以放喺我面前時都唔知係乜，無影相就食，倒左羹飯落汁至知呢個就係侍應講的飯。

助手聽到我無影相，特登整多羹我影相，咁又呃多左嘢食，兩羹倒埋一齊至試到味。飯粒黏，刨入黑松露調味後幾香，撈埋剛剛食剩的蛋汁就更好味。

酢物 池魚白板昆布卷配芝麻汁 白板昆布加醋浸軟，包住池魚食更鮮味，芝麻汁好香

食事 燒鰻魚飯 對於餐單我通常過目即忘，所以見到鰻魚飯時，有點喜出望外。因為我一直擔心唔夠飽。鰻魚肥美有炭香。

分兩食，一碗普通加汁食。

一碗加湯食

甜品 無花果香印葡萄啫喱

甜品 黃豆粉雪糕最中餅 師傅即席整軟糯的糯米糍皮，夾在餅內，增加口感。

 一餐完結，無包飲品，我覺得若能夠有杯抹茶就更完滿。

餐廳喺上環小街內，聽講係志魂的舊址，好細間，只有8個吧枱坐位，另有房間提供6個坐位，不過疫情期間只開放吧枱

呢盒黑色的魚子醬喺幾間店都見過

有自家炭爐，呢條喉黑好肥美，不過唔關我事，Omakase 餐至有得食。