Foodie 生活雜誌

今次主要係redeem到機票至去，雖然好耐無去北海道，但其實去過好幾次，好多地方去左，而且北海道的景點都無乜改變，所以plan行程時都有點頭痕。最後決定選擇我最喜愛的美瑛為主角，慢慢行。今次只得我同駕駛員二人行，可以想點就點，要幾任性有幾任性😆😆😆第一日到步札榥，去到酒店settle down 都七點幾，食個晚餐行一陣就回酒店瞓了。

自助寄行李，蛇𠺌的我，喺寄行李時神經質地係咁問職員怕唔怕寄失，職員面對呢條低b問題（即係問佢會唔會墮機一樣，佢點知啫😒）好耐心地話機會只有少過百分之一，咁答我覺得反而有誠意過話一定唔會😆見我咁緊張，職員都話唔怪得咁多人寧願排隊都唔做自助😅

飛lu，心想會唔會有一次坐飛機望出窗可以見唔到呢個大引擎？

好耐無食過似樣的飛機餐~除左蓋住點心，以為係塊紙的椰菜之外😳

見到機票有redeem，換同一個里數去日本，北海道最抵，不過無哂商務，所以換左優質經濟艙。坐落真係有點感慨，原來當你要縮喺一個小空間一段時間的時候，只係個位濶少少，有個腳踏，身體的享受已經差好遠。

到lu

酒店喺市中心，可選JR或機場巴士，我唔想上上落落又轉車，選坐機塲巴士，直出市中心好方便，domestic 同international 機場大樓都有站，但建議去domestic站上車好d，因為去到international 大樓已無乜位。

domestic 站的車票喺大樓地下counter出售，車站就喺門口，買飛後職員會比埋張紙仔你，寫上站號及下一班車時間，清清楚楚。

酒店check in後問職員介紹串燒店，再三問佢係咪堅好食，佢拍哂心口，最後發覺大家口味唔多同😅

行過麥當當，期間限定香印奶昔，嗜甜的人飲得開心

我食左餐唔合心意的，當然不罷休，行過經過，啪番半打蠔，正👍🏻

晚上落雨了，回酒店休息喇