Foodie 生活雜誌

9/2022 光顧

好耐無嚟，見到介紹話餐廳轉左用炭火串燒，出品唔錯，所以來試下。

喺日本，餐廳提供食物通常比較單一，每間餐廳只做一款菜式，天婦羅、串燒、鮨店，全部獨立成店，就算係居酒屋都以下酒小菜為主。香港就唔同，因應多心的香港人，呢度提供一站式選擇 ： 除左之前已有的爐端燒及壽司刺身counter，今次見到串燒部升級，仲加左天婦羅房間，一站式乜都有，乎合香港人心多多的特性。

餐廳不論裝修、氣氛、服務及餐牌設計等所有配套都唔錯，食材質量中規中矩，但我卻總係覺得味道好大路，唔夠精細，似港式日本菜。不過若唔計尖沙咀，呢間餐廳係九龍區食日本菜的一個好選擇。

串燒部

串燒雞尾、雞皮、雞肝、豚肉韮菜卷，串燒有炭香，表皮焦香，但調味輕手，味道較淡，燒雞肝火喉未夠，只嫩不香。韮菜卷大大舊好奇怪。

料理部

芝士廣島蠔春卷

春卷皮薄，包住全隻蠔，炸得乾身，內裡juicy，好味

爐端燒部

燒山芋

山芋切片，通常鹽燒，但呢度加牛油燒，爽口味香，無乜功夫，純粹食材取勝

天婦羅部

魷魚明太子

魷魚釀入明太子，包紫蘇葉，薄薄的粉漿，唔油膩，温度剛好，唔錯喎，令我有少少想來食午餐的衝動，但唔知係出自廚房定係天婦羅部？

壽司部

唔唔試刺身了，食卷物最穩陣。辣味吞拿魚卷，吞拿魚蓉新鮮飽滿，唔錯

梅酒

餐廳自釀梅酒，酒精味較出

餐廳開業多年，水準不俗，好多捧塲客，平日都爆滿，記得訂位

燒鳥部，用備長炭燒，好有誠意

爐端燒部，枱頭放滿高貴食材，我反璞歸真，只食山芋😆

天婦羅部，獨立房間，平日都客滿

餐廳增強天婦羅及燒鳥部，請來日本師傅助陣，加埋爐端燒部門，共有三位日本師傅，日本師傅係咪一定出品好我就唔知，但起碼有光環😇

天婦羅同燒鳥部特別介紹日本師傅主理，兩者都有廚師發辦套餐。