Foodie 生活雜誌

11/2022光顧

尖沙咀棉登徑根本係一條食街，短短一條街兩邊全部係餐廳，剩係串燒店都有三間。今次選擇木户，係因為行過被店面個小門口吸引，感覺好日本。餐廳由日本師傅主理，標榜選用日本雞，室內裝修精緻，氣氛好好。不過無論串燒的火喉、食物的味道、食材的質素都一般。有多款菜式選擇，串燒、一品料理及串揚都有。另有special menu，要問侍應至有。餐廳係荔枝角鵜舞居酒屋的姊妹店，隔離的鮨白鳥亦係同一集團，餐廳好旺塲，平日都要分兩輪，侍應話星期五六要提早兩星期訂位呢。

串燒雞肝 、雞腎 、雞皮 、雞尾、雞翼

食雞串燒，我一定點呢幾樣。我要求雞肝口感要柔軟豐腴，雞皮唔可以燒得太乾脆，要保留油脂的罪惡感，雞中翼要攤開隻雞翼來串。當晚的雞皮唔錯，但雞肝外皮有點乾，雞翼無攤開。雞尾唔夠香。另外我發覺好多人都唔食雞尾，可能比個部位嚇怕，其實雞尾好好肉又juicy，而且無怪味，唔係度度有，所以我每次見到都點。

富士蘋果豚肉卷、明太子紫蘇豚肉卷  調味偏咸，較油膩，可以燒得乾身點，免治雞肉又係燒得唔夠香

special menu 內的燒白子，酒煮鮟鱅魚肝，白子燒完，只食到一陣燶味，口感有點實，唔夠creamy。鮟鱅魚肝唔夠入味，質感亦唔夠細滑，兩者皆麻麻。

阿波尾雞翼，大大隻，肉質juicy，若點串燒手羽先的時候無指明係阿波尾雞翼，就只會比普通雞翼

燒鰻魚，燒好放上爐上枱，侍應話加多$100條魚會肥d，肉質係肥美，但燒得唔夠香，鰻魚汁偏咸，食味一般。連爐上，好處係可保持溫度，但缺點係比煙攻住。

炸雞 全名係「總廚木村先生家族秘傳宮崎南蠻炸雞1956年」，講到咁勁無理由唔食，其實係炸雞加旦沙律醬，好邪惡的菜式。不過炸雞幾油膩，食多舊都覺得滯。

燒牛舌 靱

自家製梅酒 味道淡，梅味唔出，酒精味比梅味出

餐廳門口好日式，賣點係日本師傅燒日本雞。日本日本日本…..只要見到made in japan 就得，去唔到日本的病態

我就係被呢道小門吸引，睇過書介紹日本茶室的門口都係小門設計，所有人都要彎身至再以進入，讓武士唔能夠配劍入內。

不過侍應另有解說，話係從前戲院的設計，因為怕一堆人湧入戲院會跌倒或做成混亂，所以設計要人彎低身再入，減慢速度。

餐廳細細，有吧枱及卡位，感覺唔算太迫夾