Foodie 生活雜誌

(平凡餐廳，行過都唔會留意。我的好餐廳未必係你的好餐廳，千萬唔好特登來食，怕你食完斬死我😅)

5/2020光顧

何謂好餐廳？每人標準不同，對於我，好餐廳唔需要好多星星、富麗堂皇或好味到識飛，只需肯用心的餐廳就係好餐廳。簡單的早餐，間間茶記都係一樣，但好的店會食到多士烘得香脆過人，好立克香濃過人。個個伙記都係對客，係咪個個伙記都喜歡對客？呢度的侍應友善，對客人就如老街坊，笑容滿面，喺度食完個早餐，感覺今日會有一個好開始，小確幸感覺油然而生。

(後記 : 小確幸感覺只維持一陣，因為之後開始行山，對住悲劇一樣的大斜路，所有幸福感一掃而空)

早餐可選多士，奶油、奶醬、占醬任選，多士烘得出色，薄薄的多士，金黃色的表層crispy 咬落清脆的chap 一聲，但又唔會硬到𠝹口，內裡仍保持柔軟，讚。

餐蛋麵 湯唔浸過麵，太陽蛋蛋白煎得嫩滑，餐肉稍煎香，企企理理，整件事感覺舒服，就係咁

好立克香濃，而家好多地方的好立克都淡如水，呢度可以找回小時候的味道，其實唔難，加多殼粉就得，但好多地方就係做唔到。

每枱都有一壺茶，茶餐廳少見的服務