唐人館@中環 @ Foodie 生活雜誌

5/2020光顧

岳少的食堂出名貴，趁佢近排做優惠，梗係要試下。唐人館尖沙咀店的點心放題已經full 哂，唯有轉戰中環店的特價片皮鴨及餐牌7折優惠。片皮鴨由$698減至$198，抵到爛，餐廳出品水準高，不過餐牌7折都死，我點完片皮鴨後，叫左幾碟青菜就算，叫做見識下高級食府。

話梅淮山 淮山新鮮爽甜，切成小方塊，淋上酸甜話梅汁，清新開胃

差不多枱枱都點片皮鴨，師傅片到手軟，可能多人點，訂位時侍應亦會確認烤鴨上桌時間。

片皮鴨 分兩部分，上面一碟係皮及嫩肉。師傅介紹以傳統食法 : 皮蘸糖、肉蘸蒜泥、皮肉相連蘸醬。鴨皮蘸糖直接食，鴨皮片得薄，入口酥香，雖不至於入口溶化，但有食酥皮的感覺，讚。鴨腿肉嫩，沾蒜泥食，更香口，蒜泥極香，製作認真。整隻鴨肥瘦適中，皮香肉juicy，水準高👍🏻

么么皮用新款蒸籠盛載

么么皮薄帶靭度，食多幾塊都無負擔，好味

食完鴨都幾飽，再點幾個小菜 ： 紫蘿咕嚕肉，小米漿浸菠菜葉、雞油菌乾煸法邊豆。喺呢類上等食府食飯，價錢貴就預左，但可以食得出食材認真 ：菜甜d嫩d，米漿濃d，紫薑菠蘿都新鮮d，烹調認真，不油不膩，咕嚕肉外皮鬆化，豬肉帶點點肥肉，口感更佳，其實係物有所值，只不過我食開小菜皇，埋單時仍會肉赤。