Foodie 生活雜誌

5/2020光顧

東方小祇園@大澳

聞名已久，一直以為係自己好耐之前食過，喺廣塲附近嗰間，直到今次朋友帶路至知原來我之前一直搞錯。餐廳喺南涌，與主街頗有距離，開左幾十年，地方保留昔日田園風，可能因為灣仔有間東方小祇園齋菜都好出名，好多人以為餐廳同灣仔店一樣係食齋的，其實餐廳葷菜素菜都有提供。炸物出色，兩個小菜都有水準，食物調味口感剛剛好，唔太多又唔太少，一碟碟毫不花巧的小菜，要做到剛剛好真係唔容易。因為疫情關係，四個人唔食得多，最出名的鹽焗雞唯有等下次再嚐。

提提你 : 餐廳好有型，逢星期六休息

荔芋酥卷 呢道菜我一向麻麻，因為炸物同芋頭都唔多喜歡，食親都覺得好滯。但好欣賞餐廳的出品，炸物不油不膩，腐皮入口酥化，芋頭蓉香滑，就算唔點甜酸汁都好味，比起之前食過的都高水準。

生炒排骨 排骨肥瘦適中，炸得酥脆，裹上薄薄的酸甜茨汁，一切都剛剛好。加入鮮菠蘿同炒，整道菜更添juicy 感。

椒絲腐乳通菜 通菜炒得翠綠，腐乳醬味道唔太咸又唔太淡，汁的份量剛好掛菜，留少少喺碟低，唔會水汪汪又唔會乾爭爭，剛剛好。

餐廳在南涌，遠離熱鬧的大街，有兩條路過去，舊路喺巴士站旁，近年喺碼頭旁新建大橋，風景優美，感覺似步行於水上，行得遠都唔覺。

餐廳於村內兩層高的石屋，用餐區在二樓，感覺開揚