IMG_1640.JPG

(買極都錯的火車證 )

 

今次係我第一次同太后單獨去旅行,太后的古怪思維一向令人激心激肺,我今次明知山有虎,偏向虎山行,實在與自殺無異,未出發時已感到壓力,連續買錯兩次火車證,更因此要改行程。原本我只係去東京同仙台,應該買JR東日本5天pass,點知發左瘟咁,買pass 的時候只係望住東北兩個字,買錯左北海道東北5天pass,攞票時職員話我知張pass唔包東京至東北一段,大驚之下立即退票,另購一張北海道東北6天pass,包埋東京段,點知買完回家後至醒起我根本唔去北海道,但無理由又退,所以決定改行程,去埋函館。原本千四蚊的車票結果比左二千二(連退票手續費)真係未出發先破財。

 

由於我係第一次單獨同長者去旅行,當然要用下優惠,將太后當係一張fast pass,要排隊時就指住太后講 : 「長者,長者」,結果真係快好多,到上機時又想用,不過太后勸我收手,我唯在乖乖排隊。

 

到達日本,是日戲肉來了。一向對任何電子電訊產品智障的我,去日本用電話咭指定要用中聯通,其他一概用唔到/唔識用。今次原本係用CSL送的漫遊plan,唔使換咭,聲稱只需到步後開啓漫遊數據就得。不過憑我一向與所有電訊商相冲相剋的歴史背景,我已一早叫駕駛員買定張中聯通咭做後備,但佢居然買左張KK day,見佢拍哂心口話得,我又信佢。歴史只會不斷重演,去到當然係兩樣都唔得,我係上網人,失去網絡就如失去一切,個心荒哂,仲要帶住太后,唯有用機場wifi 通知駕駛員打去CSL研究,當時我仲控制到情緒。

 

喺火車上不斷將兩張電話卡換來換去都唔得,太后不停我耳邊講 :「係咪唔得?」「唔得咪由佢囉」,最後在我怒睥下收聲。到左東京站,佢似乎感受到情況嚴峻,之前好大支嘢地叫我揾繩拖住佢,來到見到車站的盛況,只敢跟到貼。結果張咭仲未用得,我去tourist informations 借wifi時已經想殺左駕駛員,但公眾地方唔可以大聲吼叫,又再死忍。

 

直至去到酒店,一駁wifi,全日的怒火一下爆發,我失控地狂鬧駕駛員,嚇到太后聲都唔敢聲。到我回服理智時已經係晚上7,為怕miss左太后個鰻魚飯,半塲休息,今晚再鬧過。餐廳在銀座,唔難揾,好彩呢餐太后滿意。

 

番到酒店張咭仲未得,我要親自打去CSL,(講明唔收費) 結果原來係個APN問題,唔明駕駛員點解問左半日都問唔到。終於個心定落嚟,太后弱弱地講句 : 「其實你剛剛發左癲咁鬧駕駛員時好恐怖,我係咁求黃大仙叫佢保佑你張咭用到🙏🏻」我估老黃真係未接過呢d訴求🤣

 

龍貓香港站

 

IMG_1641_35535545.JPG

 

fast pass

 

IMG_1642.JPG

 

太后愛鰻魚

 

IMG_1643_35535467.JPG

 

熱愛馬吊的太后,一眼就見到個招牌,要影相。幾驚佢要入去打兩個東

 

IMG_1644_35535436.JPG

 
 
 

 

 

 

 

 

    全站熱搜

    Hearoom 發表在 痞客邦 留言(1) 人氣()